សាកសពនាវាអាយុកាលរាប់សិបឆ្នាំ ប្រវែង៧០ម៉ែត្រ ត្រូវបានរកឃើញក្នុងដែនសមុទ្រខ្មែរ

2018-04-15 03:21:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សាកសពនាវា ដែលមានអាយុកាលរាប់សិបឆ្នាំ ត្រូវបានក្រុមអ្នកមុជទឹកស្ម័គ្រចិត្តកម្ពុជា ប្រទះឃើញក្នុងបាតសមុទ្រ នៃដែនសមុទ្រកម្ពុជា អំឡុងពេលប្រតិបត្តិការស្រាវជ្រាវជីវៈចម្រុះក្នុងបាតសមុទ្រ កាលពីពេលថ្មីៗនេះ។

លោកឧត្តមនាវីឯក ទៀ សុខា មេបញ្ជាការរងកងទ័ពជើងទឹក មេបញ្ជាការទីបញ្ជាការជួរមុខ នៃគណៈកម្មាធិការជាតិ សន្តិសុខលម្ហសមុទ្រ និងជាប្រធានក្រុមការងារអ្នកមុជទឹកស្ម័គ្រចិត្តកម្ពុជា បានប្រាប់មជ្ឈមណ្ឌលព័ត៌មានដើមអម្ពិល នៅថ្ងៃទី១៥ ខែមេសា ឆ្នាំ២០១៨ នេះថា "ក្រុមអ្នកមុជទឹកស្ម័គ្រចិត្តកម្ពុជាយើង បានប្រទះឃើញ សពនាវាដែលមានអាយុកាលរាប់សិនឆ្នាំ ប្រវែងប្រមាណ ៧០ម៉ែត្រ ដែលបានលិច ក្នុងដែនសមុទ្រខ្មែរ"។

ឧត្តមនាវីឯក ទៀ សុខា បានបញ្ជាក់បន្ថែមថា "សពនាវានេះ ត្រូវបានប្រទះឃើញ កាលពីថ្ងៃទី៤ ខែមេសា ឆ្នាំ២០១៨ យើងមិនទាន់ដឹងច្បាស់ថា នាវានេះ ជាប្រភេទនាវាអ្វី ហើយត្រូវបានលិចក្នុងសម័យកាលណានោះទេ ព្រោះថាសពនាវា មានអាយុកាលរាប់សិបឆ្នាំ ត្រូវបានផ្កាថ្មដុះពីលើ ខាងក្នុងមានហ្វូងមច្ឆា និងជីវៈចម្រុះជាច្រើន។ ហើយពេលនេះដែរ ក្រុមការងារយើង កំពុងធ្វើការបន្តសិក្សាស្រាវជ្រាវ អំពីអត្តសញ្ញាណ និងអាយុកាលរបស់នាវានេះ"។

ចុចអានអត្ថបទទាក់ទង៖ កម្ពុជា បន្តយកថ្មសិប្បនិម្មិត ទៅទម្លាក់ចូលបាតសមុទ្រ

សូមទស្សនារូបភាពជាច្រើនសន្លឹក បង្ហាញពីសាកសពនាវានោះ ដូចខាងក្រោម៖