មេចារកម្ម CIA ទៅជួប គីម ជុងអ៊ុន យ៉ាងសម្ងាត់ មុនជំនួបកំពូលមេដឹកនាំអាមេរិក-កូរ៉េខាងជើង

2018-04-18 02:52:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Mike Pompeo នាយកទីភ្នាក់ងារចារកម្មអាមេរិក បានធ្វើទស្សនកិច្ចយ៉ាងសម្ងាត់ទៅប្រទេសកូរ៉េខាងជើង ដោយបានជួបពិភាក្សាដោយផ្ទាល់ជាមួយលោក គីម ជុងអ៊ុន កាលពីចុងសប្ដាហ៍មុន។ នេះបើតាមការបញ្ជាក់ពីមន្ត្រីជាន់ខ្ពស់របស់សហរដ្ឋអាមេរិក កាលពីថ្ងៃទី១៧ ខែមេសា ២០១៨ ម្សិលមិញ។

លោក Mike Pompeo នាយកទីភ្នាក់ងារចារកម្មអាមេរិក

ចំណែកលោកស្រី Sarah Sanders អ្នកនាំពាក្យប្រធានាធិបតីអាមេរិក បានបញ្ជាក់ថា ប្រធានាធិបតី ត្រាំ បានឲ្យដឹងថា មន្រ្តីជាន់ខ្ពស់របស់រដ្ឋបាលសហរដ្ឋអាមេរិកបានជួបពិភាក្សាជាមួយខាងភាគីកូរ៉េខាងជើងហើយ ប៉ុន្ដែប្រធានាធិបតី ត្រាំ មិនទាន់មានការសន្ទនាដោយផ្ទាល់ទៅកាន់ភាគីកូរ៉េខាងជើងនោះទេ។

សូមបញ្ជាក់ថា ទស្សនកិច្ចរបស់លោក Mike Pompeo ទៅកាន់កូរ៉េខាងជើង គឺក្រោយរូបលោក ត្រូវបានប្រធានាធិបតីអាមេរិក ប្រកាសតែងតាំងជារដ្ឋមន្រ្តីការបរទេស និងបានចូលឆ្លើយបំភ្លឺជាមួយគណៈកម្មការកិច្ចការទំនាក់ទំនងអន្តរជាតិរបស់ព្រឹទ្ធសភាអាមេរិក កាលពីសប្ដាហ៍មុន។ ចំណែកប្រធានាធិបតី ត្រាំ ក៏ធ្លាប់បានប្រកាសថា ជំនួបរូបលោក និងលោក គីម ជុងអ៊ុន អាចធ្វើឡើងនៅចន្លោះខែឧសភា និងមិថុនា ២០១៨ ខាងមុខនេះ៕