លោក ស៊ី ជិនពីង នឹងធ្វើទស្សនកិច្ចទៅកូរ៉េខាងជើង ជាលើកដំបូង

2018-04-18 08:19:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីចិន លោកស៊ី ជិនពីង កំពុងរៀបចំពេលវេលាសមស្របណាមួយ ដើម្បីទៅបំពេញទស្សនកិច្ចនៅទីក្រុងព្យុងយ៉ាងជាលើកដំបូងគិតចាប់ពីលោក បានឡើងកាន់តំណែងជាប្រមុខដឹកនាំបក្សកុម្មុយនិស្ត ចិនក្នុងខែវិច្ឆិកា ឆ្នាំ២០១២។ នេះបើតាមប្រភពមន្ត្រីម្នាក់ដែលដឹងពីការពិភាក្សានេះ ប្រាប់ទៅកាន់សារព័ត៌មានCNN នៅថ្ងៃទី១៨ មេសានេះ។

លោកស៊ី ជិនពីង(ស្តាំ) និងលោកគីម ជុងអ៊ុន(ឆ្វេង) ស្ថិតក្នុងពិធីទទួលទានអាហារពេលល្ងាចនាទីក្រុងប៉េកាំង កាលពីខែមីនា។ (រូបភាព៖ កាសែតរដ្ឋកូរ៉េខាងជើង)

មន្ត្រីដែលសុំមិនបញ្ចេញអត្តសញ្ញាណខាងលើ បានប្រាប់ឲ្យដឹងថា ការបំពេញទស្សនកិច្ចរបស់លោកស៊ី នឹងត្រូវធ្វើឡើងនាពេលឆាប់ៗខាងមុខនេះ ប្រហែលបន្ទាប់ពីកិច្ចប្រជុំកំពូលរវាងប្រធានាធិបតីលោកដូណាល់ ត្រាំ និងមេដឹកនាំកូរ៉េខាងជើង លោកគីម ជុងអ៊ុន ដែលត្រូវរំពឹងថា នឹងធ្វើឡើងនាចុងខែឧសភា ឬដើមខែមិថុនា។

សូមជម្រាបថា គម្រោងទស្សនកិច្ចរបស់អគ្គបុរសចិនរូបនេះ គឺធ្វើឡើង ដើម្បីឆ្លើយតបតាមការអញ្ជើញរបស់លោកគីម ជុងអ៊ុន អំឡុងពេលដែលលោកគីម បានទៅបំពេញទស្សនកិច្ចនាទីក្រុងប៉េកាំង កាលពីខែមីនាកន្លងទៅ៕

ប្រភព៖ CNN ប្រែសម្រួល៖ អឹុម ម៉េងស៊ាង