កម្ពុជា និងវៀតណាម ជាជម្រើសនៃការវិនិយោគលើផ្នែកអចលនទ្រព្យនៅអាស៊ី

2018-04-19 01:55:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា វៀតណាម និងប្រទេសមួយចំនួនទៀតនៅតំបន់អាស៊ី គឺជាទីផ្សារដ៏មានសក្តានុពលសម្រាប់អចលនទ្រព្យបែបជំនួញ និងការរស់នៅ។ នេះបើតាមការលើកឡើងរបស់លោក Somil Agrawal នាយកជាន់ខ្ពស់ ១រូបនៅក្រុមហ៊ុនឥណ្ឌា Cushman & Wakefield India ដែលត្រូវបានដកស្រង់សម្តីដោយ សារព័ត៌មាន Hindustantimes កាលពីថ្ងៃទី១៧ ខែមេសា ឆ្នាំ២០១៨។

សំណង់អគារធំៗនៅកណ្តាលរាជធានីភ្នំពេញ

លោកលើកឡើងថា ក្នុងពេលដែលទីផ្សារអចលនទ្រព្យកំពុងឡើងថ្លៃខ្លាំងក្នុងប្រទេសអភិវឌ្ឍន៍រួមមាន សិង្ហបុរី ចិន និងជប៉ុន អ្នកវិនិយោគទុនមធ្យម កំពុងងាកទៅរកប្រទេសដែលមានតម្លៃអចលនទ្រព្យទាបនៅឡើយ ដូចជានៅប្រទេសកម្ពុជាជាដើម ហើយសង្ឃឹមថា តម្លៃអចលនទ្រព្យទាំងនោះ នឹងអាចមានតម្លៃខ្ពស់ ក្នុងរយៈពេលខ្លី និងរយៈពេលវែង។

លោកបានបញ្ជាក់ថា ការប្រែប្រួលប្រជាសាស្រ្ត កំណើននគរូបនីយកម្ម និងសេដ្ឋកិច្ចយ៉ាងឆាប់រហ័ស និងគម្រោងហេដ្ឋារចនាសម្ព័ន្ធ បានធ្វើឲ្យតំបន់អាស៊ីក្លាយជាទិសដៅដ៏ទាក់ទាញលើការវិនិយោគអចលនទ្រព្យយ៉ាងពិតប្រាកដ។

គួររំលឹកថា របាយការណ៍១របស់ក្រុមហ៊ុន Knight Frank ដែលចេញផ្សាយកាលពីខែមុន បានរកឃើញថា ដីធ្លីឯកជននៅក្នុងតំបន់អាស៊ី បានបន្តកើនឡើង បើទោះបីជាមានបញ្ហាខ្លះៗនៅក្នុងឆ្នាំ២០១៧ក៏ដោយ ជាពិសេសក្នុងទីក្រុងម៉ានីល ប្រទេសហ្វីលីពីន ក្រុងហ្សាការតា ប្រទេសឥណ្ឌូណេស៊ី និងក្រុងភ្នំពេញ ប្រទេសកម្ពុជា៕

ប្រភព៖ Hindustantimes ប្រែសម្រួល៖ សំភី