តើអរិភាពពាណិជ្ជកម្ម ចិន-អាមេរិក វិវត្តដល់ណាហើយ?

2018-04-19 08:03:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសចិន និងសហរដ្ឋអាមេរិក បានប្រឈមមុខដាក់គ្នាយ៉ាងខ្លាំងលើបញ្ហាពាណិជ្ជកម្ម ដែលបានផ្ទុះឡើងនៅចាប់តាំងពីដើមឆ្នាំ២០១៨។ បញ្ហានេះ ដំបូងផ្ដើមពីក្រុងវ៉ាស៊ីនតោន ដែលបានដំឡើងពន្ធលើផ្ទាំងកញ្ចក់សូឡា បន្ទាប់មកទៀត ដំឡើងពន្ធលើដែកថែប និងអាលុយមីញ៉ូម និងចុងក្រោយ បានដំឡើងពន្ធលើទំនិញចិន ដែលមានទំហំដល់ ៦០ពាន់លានដុល្លារ។ ចំណែកប្រទេសចិនវិញ ក៏មិនបាននៅស្ងៀមដែរ បានសម្រេចដំឡើងពន្ធចំនួន ២៥% លើទំនិញនាំចូលរបស់សហរដ្ឋអាមេរិកចំនួន ១២៨មុខ ដែលមានទំហំទឹកប្រាក់ប្រមាណ ៣ពាន់លានដុល្លារ។

លោក ស៊ី ជិនពីង ប្រធានាធិបតីចិន (ឆ្វេង) និងលោក ដូណាល់ ត្រាំ ប្រធានាធិបតីអាមេរិក

នៅថ្ងៃទី១៩ ខែមេសា ២០១៨នេះ ខាងក្រសួងពាណិជ្ជកម្មចិនបានចេញមកបញ្ជាក់ថា ប្រទេសចិន និងប្រទេសអាមេរិកមិនទាន់បានចាប់ផ្ដើមការចរចាគ្នាណាមួយនៅឡើយទេ លើបញ្ហាអរិភាពពាណិជ្ជកម្មរវាងប្រទេសទាំងពីរ។ ក្នុងនោះ លោក Gao Feng អ្នកនាំពាក្យក្រសួងពាណិជ្ជកម្មចិន បានបញ្ជាក់ថា សហរដ្ឋអាមេរិកបានឆ្លើយតបចំពោះសំណើរបស់ចិនទៅអង្គការពាណិជ្ជកម្មពិភពលោក (WTO) ហើយ សម្រាប់ការចរចាលើទំនិញនាំចូលរបស់ចិនទៅអាមេរិក ប៉ុន្តែការឆ្លើយតបនោះ ជានីតិវិធីប៉ុណ្ណោះ។

អាមេរិកបានប្រាប់ទៅអង្គការពាណិជ្ជកម្មពិភពលោកថា អាមេរិកយល់ព្រមពិភាក្សាជាមួយរដ្ឋាភិបាលចិន ប៉ុន្ដែអាមេរិកបានភ្ជាប់មូលហេតុសន្តិសុខជាតិសម្រាប់ពន្ធលើលោហៈធាតុ ហើយបានលើកឡើងថា យន្តការរបស់អង្គការពាណិជ្ជកម្មពិភពលោក មិនអាចដោះស្រាយបញ្ហាបាននោះទេ។

លោក Gao Feng អ្នកនាំពាក្យក្រសួងពាណិជ្ជកម្មចិន

អ្នកនាំពាក្យក្រសួងពាណិជ្ជកម្មចិន ក៏បានបញ្ជាក់ដែរថា ចិនបានត្រៀមរួចរាល់ហើយ ដើម្បីទប់ទល់នឹងផលអវិជ្ជមានពីអរិភាពពាណិជ្ជកម្មជាមួយអាមេរិក ហើយចិនសង្ឃឹមថា អាមេរិកនឹងមិនមើលរំលងក្រុងប៉េកាំង ដែលនឹងធ្វើការឆ្លើយតបទៅអាមេរិកវិញ។ អ្នកនាំពាក្យដដែលនេះ បញ្ជាក់ថា ប្រសិនបើភាគីអាមេរិកនៅតែបន្ដអនុវត្តគោលនយោបាយគាំពារនិយម និងប៉ះពាល់ដល់ផលប្រយោជន៍របស់ក្រុមហ៊ុនចិន និងអាមេរិក ប្រទេសចិននឹងធ្វើការប្រឆាំងអាមេរិកវិញ៕

ប្រភព៖ CGTN ប្រែសម្រួល៖ វាសនា