តួកគីប្ដេជ្ញាជំរុញឲ្យមានការហោះហើរត្រង់មកកម្ពុជាទាល់តែបាន ដើម្បី...

2018-04-20 02:20:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកស្រី អេយដា អុងលូ ឯកអគ្គរដ្ឋទូតតួកគីប្រចាំកម្ពុជា បានបញ្ជាក់ថា ក្នុងអាណត្តិការងារនៅកម្ពុជា លោកស្រីនឹងជំរុញឲ្យមានជើងហោះហើរត្រង់មកកម្ពុជាឲ្យទាល់តែបាន ដើម្បីផ្លាស់ប្ដូរចរន្តភ្ញៀវទេសចរពីគ្នាទៅវិញទៅមក។

លោកស្រី អេយដា អុងលូ និងលោក ថោង ខុន/ រូបភាព៖ ក្រសួងទេសចរណ៍

ការលើកឡើងរបស់លោកស្រីធ្វើឡើងកាលពីថ្ងៃទី១៩ ខែមេសា ឆ្នាំ២០១៨ នៅក្នុងជំនួបពិភាក្សាជាមួយលោក ថោង ខុន រដ្ឋមន្ត្រីក្រសួងទេសចរណ៍។ នៅក្នុងជំនួបនេះដែរ លោក ថោង ខុន បានស្នើឲ្យភាគីតួកគី ពិនិត្យលទ្ធភាពក្នុងការបណ្ដាក់ទុនវិនិយោគនៅកម្ពុជា តួយ៉ាងដូចជាការវិនិយោគលើការបង្កើតសាលាបណ្ដុះបណ្ដាលវិជ្ជាជីវៈទេសចរណ៍ជាដើម។

ឆ្លៀតក្នុងឱកាសនោះផងដែរ លោករដ្ឋមន្ត្រីក៏បានណែនាំប្រាប់លោកស្រីឯកអគ្គរដ្ឋទូតតួកគីអំពីតំបន់ទេសចរណ៍ជាច្រើននៅកម្ពុជា ដូចជា ប្រាសាទអង្គរវត្ត ប្រាសាទព្រះវិហារ ប្រាសាទសំបូរព្រៃគុក តំបន់ឆ្នេរសមុទ្រ តំបន់អេកូទេសចរណ៍ព្រៃកោងកាង អារ៉ែង និងភូមិភាគឦសានជាដើម។ លោកក៏បានគោរពអញ្ជើញលោកជំទាវឯកអគ្គរដ្ឋទូត ទៅទស្សនាតំបន់ឆ្នេរសមុទ្រ តំបន់អេកូទេសចរណ៍នៅកម្ពុជាផងដែរ។

យន្តហោះតួកគី/ រូបភាព៖ opodo

សូមជម្រាបថា ជើងហោះហើរត្រង់ដែលប្រទេសតួកគីកំពុងហោះហើរនេះ មានចំនួន ១១៩ប្រទេស ឆ្ពោះទៅកាន់ទីក្រុងប្រមាណ ២៥០ទីក្រុង ក្នុងនោះនៅតំបន់អាស៊ាន មានប្រទេសថៃ សិង្ហបុរី ម៉ាឡេស៊ី វៀតណាម ហ្វីលីពីន និងឥណ្ឌូណេស៊ី៕

អត្ថបទ៖ ឈាង.