កាសែត Khmer Times

ចំនួនអ្នកដំណើរដែលជិះយន្តហោះ ៖ អាកាសយានដ្ឋាននៅក្នុងស្រុក ស្វាគមន៍អ្នកដំណើរ៣លាននាក់នៅក្នុងត្រីមាសដំបូងៈ នេះជាចំនួនអ្នកធ្វើដំណើរដែលឆ្លងកាត់ អាកាសយានដ្ឋានសំខាន់ៗចំនួន៣។ ចំនួននេះ បានធ្វើឱ្យកំណើនអ្នកធ្វើដំណើរឡើងដល់ ២៦.១% ។ ការកើនឡើងនេះ គឺដោយសារការហោះហើរមកពីប្រទេសចិន និង ការបើកជើងហោះហើរថ្មី។

ចិនគាំទ្រនគរបាលខ្មែរដែលកម្ទេចសម្បុកឧក្រិដ្ឋជន ៖ ការនិយាយនេះ គឺសំដៅទៅជនជាតិចិនដែលមករកស៊ី ធ្វើការ ហើយប្រព្រឹត្តិបទល្មើសនៅស្រុកខ្មែរ។

ទូតបារាំងនឹងធ្វើកម្មវិធីសប្បុរសធម៌ដើម្បីរៃលុយជួយសត្វដំរី ៖ កម្មវិធីនេះ នឹងធ្វើឡើងនៅថ្ងៃទី២៧ ខែមេសា ក្រោមប្រធានបទ "ភាពជាម្តាយ"។ អ្នកចូលរួមអាចនឹងបង់ប្រាក់ចន្លោះពី ៥០$ ទៅ ២០០០$។

អាកាសចរណ៍ចិន បន្ថែមជើងហោះហើរទៅសៀមរាប ៖ ក្រុមហ៊ុនដឹកអ្នកដំណើរចិនឈ្មោះ Gunagxi Beibu Gulf Airlines គ្រោងនឹងបន្ថែមជើងហោះហើររបស់ខ្លួនពីទីក្រុងណាននីងមកខេត្តសៀមរាប ដោយចាប់ផ្តើមនៅថ្ងៃទី ២៩ ឧសភា ឆ្នាំ ២០១៨ នេះ។

កាសែត រស្មីកម្ពុជា

ឆ្លើយតបទៅកាសែតថៃរឿងអាវុធៈ អ្នកនាំពាក្យក្រសួងការពារជាតិ គ្មានទេអាវុធពីកម្ពុជា ៖ ការបដិសេធនេះ ធ្វើឡើងបន្ទាប់ពីសារព័ត៌មានថៃមួយចំនួន បានផ្សាយថា សមត្ថកិច្ចថៃនៅព្រំដែនខេត្តត្រាត-កោះកុង ចាប់បានអាវុធខុសច្បាប់ដែលដឹកចេញពីកម្ពុជាចូលប្រទេសថៃ។ អ្នកនាំពាក្យថា អាវុធនេះ មិនមែនដឹកចេញពីកម្ពុជាទេ។ កម្ពុជាមិនមាន ប្រភេទអាវុធដែលសមត្ថកិច្ចថៃចាប់បាននោះទេ។

ព្រះមហាក្សត្រត្រាស់បង្គាប់ឱ្យសមាជិកព្រឹទ្ធសភាថ្មីទាំង៦២រូប ចូលប្រជុំលើកដំបូងនៅថ្ងៃទី ២៣មេសា ៖ ៦២រូបនេះ ជាសមាជិកព្រឹទ្ធសភានីតិកាលទី៤ ដែលចាត់តាំងដោយព្រះមហាក្សត្រ និងជ្រើសតាំងដោយរដ្ឋសភា ព្រមទាំង ជាប់ជាសមាជិកដោយការបោះឆ្នោតអសកល កាលពីថ្ងៃទី ២៥កុម្ភៈ។ ការប្រជុំចាប់ផ្តើមនៅម៉ោង ៩ព្រឹក នាវិមានព្រឹទ្ធសភា។

មន្ត្រីប៉ូលិសចិន ស្នើប៉ូលិសកម្ពុជា ជួយការពារវិនិយោគិនចិនតែអ្នកប្រព្រឹត្តខុសឱ្យធ្វើតាមច្បាប់

ជលផលដេញចាប់អ្នកឆក់ត្រី បុរសម្នាក់ភ័យរត់ធ្លាក់ទឹកបាត់ជិតមួយសប្តាហ៍ បានរកសពឃើញ ៖ ហេតុការណ៍នេះ កើតឡើងកាលពីថ្ងៃទី ១២ មេសា នៅភូមិដើមព្រីង ឃុំកោះខែល ស្រុកស្អាង ខេត្តកណ្តាល។

នាវាដឹកអ្នកដំណើរតាមផ្លូវទឹកពីព្រែកព្នៅ-ភ្នំពេញ-តាខ្មៅ ទទួលបានអ្នកដំណើរ ជិត៣ពាន់នាក់ នាឱកាសបុណ្យចូលឆ្នាំ

បើករថយន្តថយក្រោយ កិនក្មេងស្រីអាយុជាងមួយឆ្នាំ បណ្តាលឱ្យស្លាប់

ពលរដ្ឋសម្រុកធ្វើប័ណ្ណព្រំដែន ក្រោយបញ្ចប់ថ្ងៃចូលឆ្នាំខ្មែរ

កាសែត កោះសន្តិភាព

មនុស្សនៅតែដើរ ត្រៀមកម្លាំង៨ម៉ឺននាក់ ការពារដំណើរការបោះឆ្នោត ៖ នេះបើតាមនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ ។ កម្លាំង៨ម៉ឺននាក់ ដែលនឹងការពារការបោះឆ្នោតតំណាងរាស្ត្រអាណត្តិទី៦ នាថ្ងៃទី ២៩ កក្កដា ២០១៨ ខាងមុខមាន កងយោធពលខេមរភូមិន្ទ កងរាជអាវុធហត្ថ និង កម្លាំងប្រជាការពារ។

ស្នេហ៍កម្ម សុំជានាមិនព្រម តាមផ្តាច់ជីវិតស្រីស្រស់ ៖ ហេតុការណ៍នេះ កើតមានឡើងនៅភូមិកំពង់ចម្លង ឃុំព្រែកទម្លាប់ ស្រុកលើកដែក ខេត្តកណ្តាល កាលពីម្សិលមិញ។ កាសែតរៀបរាប់ថា បុរសជាជនដៃដល់ បានប្រើកាំបិតផ្គាក់កាប់លើអតីតប្រពន្ធរបស់ខ្លួន ចំនួន៣កាំបិត បណ្តាលឱ្យស្លាប់នៅនឹងកន្លែង បន្ទាប់ពីនិយាយសុំជានាគ្នាវិញ មិនបានសម្រេច។ ក្រោយសម្លាប់ប្រពន្ធរួចហើយ ជនដៃដល់ បានទៅលោតទឹកសម្លាប់ខ្លួននៅស្ពានអ្នកលឿង។

ACU ជំរុញឱ្យកម្ចាត់ហាងលក់សាច់សត្វព្រៃដុះស្លែ២ នៅក្រុងតាខ្មៅ

ពលករខ្មែរប្រុសស្រីសម្រុកចូលទៅប្រទេសថៃ តាមច្រកព្រំដែន ក្រោយពិធីបុណ្យចូលឆ្នាំបានបញ្ចប់

សង្ស័យមានគេលួចដុតឃ្លាំងស្តុកបទល្មើសព្រៃឈើ

សុំប្រពន្ធចុងទៅលេងប្រពន្ធដើមមិនបាន លោកតាប្តីតូចចិត្ត ចងកសម្លាប់ខ្លួន ស្មាលាទាំង២

កាសែត កម្ពុជាថ្មី

តេជោសែន៖ ទោះក្នុងតម្លៃណាក៏ដោយ ត្រូវរួមគ្នាការពារសន្តិភាពឱ្យខាងតែបាន ៖ សារនេះត្រូវបានបង្ហោះនៅលើទំព័រហ្វេសប៊ុករបស់សម្តេច កាលពីថ្ងៃទី ១៩មេសាម្សិលមិញ។ កាសែតក៏បានដកស្រង់សំណេររបស់សម្តេចដែលបានលើកឡើងពី ការបែងចែកតំបន់ត្រួតត្រាក្នុងប្រទេសខ្មែរកាលពីអតីត រហូតដល់មានការផ្សះផ្សារ ការធ្វើសមាហរណកម្ម រស់នៅរួមគ្នាក្នុងកម្ពុជាបច្ចុប្បន្ននេះ។

រដ្ឋាភិបាលតួកគីចាត់ទុកចំណាត់ការផ្លូវច្បាប់ទៅលើក្រុមប្រឆាំង នាពេលកន្លងមក គឺជាបញ្ហាផ្ទៃក្នុងរបស់កម្ពុជា

ប្រជាពលរដ្ឋ ខេត្តព្រះសីហនុសម្តែងការព្រួយបារម្ភ ខណៈពេលកាស៊ីណូចំនួន២៥ បើកចំហរឱ្យខ្មែរចូលលេងដោយសេរី

ទំព័រមុខរបស់សារព័ត៌មានខ្មែរ នឹងមានផ្សាយជូនរៀងរាល់ព្រឹក ពីថ្ងៃចន្ទដល់ថ្ងៃសុក្រ

អត្ថបទ៖ ឃុត សុខឿន