រោងចក្រផលិតភេសជ្ជៈប៉ូវកម្លាំងនៅស្វាយរលំ ត្រូវបើកដំណើរការធម្មតាវិញ

2018-04-25 04:00:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រោងចក្រផលិតភេសជ្ជៈប៉ូវកម្លាំង B-Smart ដែលស្ថិតនៅឃុំស្វាយរលំ ស្រុកស្អាង ខេត្តកណ្តាល បានបើកដំណើរការធម្មតាឡើងវិញ ដោយសារតែរោងចក្រនោះ មានច្បាប់អនុញ្ញាតត្រឹមត្រូវ ពោលគឺមានកំហុសតែរឿងបញ្ហាអនាម័យប៉ុណ្ណោះ។ នេះបើតាមការបញ្ជាក់របស់លោកឧត្តមសេនីយ៍ ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច កាលពីថ្ងៃទី២៤ ខែមេសា។

សូមរំលឹកថា កាលពីថ្ងៃទី២០ ខែមេសា ប៉ូលិសសេដ្ឋកិច្ច នៃក្រសួងមហាផ្ទៃ បានចុះត្រួតពិនិត្យរោងចក្រផលិតភេសជ្ជៈប៉ូវកម្លាំងខាងលើ (ចុចអាន) ដោយព័ត៌មានបឋមបញ្ជាក់ថា រោងចក្រនោះពុំមានច្បាប់អនុញ្ញាតត្រឹមត្រូវ ហើយផលិតភេសជ្ជៈ ដែលធ្វើឲ្យប៉ះពាល់ដល់សុខភាពអ្នកបរិភោគ។ យ៉ាងណាក្ដី តាមការបញ្ជាក់របស់លោកឧត្តមសេនីយ៍ ចាន់ វ៉ាន់ធឿន នៅថ្ងៃទី២៤ ខែមេសា គឺរោងចក្រនោះ មានច្បាប់អនុញ្ញាតត្រឹមត្រូវ។

លោកឧត្តមសេនីយ៍ ចាន់ វ៉ាន់ធឿន បានបន្តទៀតថា ទាក់ទងបញ្ហាអនាម័យ គឺខាងមន្រ្ដីជំនាញ បានធ្វើការអប់រំ និងឲ្យម្ចាស់រោងចក្រធ្វើកិច្ចសន្យា។

លោក ម៉ាត់ យូសុះ នាយការិយាល័យប្រឆាំងបទល្មើសកម្មសិទ្ធិបញ្ញា បានឲ្យដឹងថា រោងចក្រខាងលើ បានផលិតភេសជ្ជៈជាច្រើនប្រភេទ ដូចជា B-Smart Grean Tea Honey Strawberry Energy Drink បៃតង Energy Drink ខៀវ ជាដើម។ យោងតាមការសម្របសម្រួលរបស់លោក ហេង ផេង ព្រះរាជអាជ្ញារងនៃអយ្យការអមសាលាដំបូងខេត្តកណ្តាល បានតម្រូវឲ្យម្ចាស់រោងចក្រធ្វើការកែតម្រូវឲ្យបានត្រឹមត្រូវ តាមបទដ្ឋានបច្ចេកទេស និងអនាម័យត្រឹមត្រូវ៕