ផ្លូវជាតិចំនួន២ នឹងត្រូវបើកការដ្ឋានពង្រីកដល់ ៤គន្លងជាផ្លូវការ ក្នុងខែឧសភានេះ

2018-05-06 07:18:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវជាតិលេខ៣ និងកំណាត់ផ្លូវជាតិលេខ៥ នឹងត្រូវបើកការដ្ឋានពង្រីកពី២គន្លង ទៅ៤គន្លង នៅក្នុងឧសភា ឆ្នាំ២០១៨នេះ ក្រោមអធិបតីភាពសម្តេចនាយករដ្ឋមន្រ្តី ហ៊ុន សែន។

ផ្លូវជាតិលេខ៣ ថតពីលើអាកាសកាលពីខែកក្កដា ឆ្នាំ២០១៧។ រូបថត៖ ក្រសួងសាធារណការ និងដឹកជញ្ជូន

បើតាមលោក ស៊ុន ចាន់ថុល បានថ្លែងក្នុងពិធីបើកឱ្យដំណើរការបណ្តោះអាសន្នរថភ្លើងដឹកអ្នកដំណើរពីសិរីសោភ័ណ-បាត់ដំបង កាលពីសប្តាហ៍មុន ឱ្យដឹងថា ផ្លូវជាតិលេខ៣ ពីចោមចៅទៅខេត្តកំពត នឹងត្រូវបើកការដ្ឋានពង្រីកជាផ្លូវការនៅថ្ងៃទី៧ ខែឧសភា ឆ្នាំ២០១៨។

សូមបញ្ជាក់ថា គម្រោងពង្រីកផ្លូវជាតិលេខ៣នេះ គឺត្រូវបានបែងចែកជា២កំណាត់ គឺកំណាត់ផ្លូវចោមចៅ-បែកគូស នឹងត្រូវពង្រីកពី២ គន្លងទៅ៤គន្លង (២ទៅ ២មក) និងកំណាត់ផ្លូវបែកគូស-កំពត នឹងត្រូវពង្រីកទទឹងផ្លូវបន្ថែម ប៉ុន្តែមាន ២គន្លងដដែល។

ចំណែកកំណាត់ផ្លូវជាតិលេខ៥ នឹងត្រូវបើកការដ្ឋានពង្រីកនៅថ្ងៃទី២១ ខែឧសភា ឆ្នាំ២០១៨ ខាងមុខនេះផងដែរ។ ការពង្រីកផ្លូវនេះ គឺចាប់ពីចំណុចព្រែកក្តាម ខេត្តកណ្តាល ទៅធ្លាម្អម ខេត្តពោធិ៍សាត់ ពី២គន្លង ទៅ៤គន្លង ប្រវែងជាង ១៣៥គីឡូម៉ែត្រ៕