រយៈពេលសាងសង់ពង្រីកផ្លូវជាតិលេខ៣ ពីភ្នំពេញ ទៅកំពត

2018-05-07 04:01:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ការដ្ឋានពង្រីកផ្លូវជាតិលេខ៣ ពីភ្នំពេញ (ចោមចៅ) ទៅក្រុងកំពត ប្រវែង១៣៤គីឡូម៉ែត្រ នឹងត្រូវប្រើប្រាស់រយៈពេលសាងសង់ប្រមាណ ៤៨ខែ។ នេះបើតាមការថ្លែងបញ្ជាក់របស់លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ក្នុងពិធីបើកការដ្ឋានពង្រីកផ្លូវជាតិលេខ៣ នាព្រឹកថ្ងៃទី៧ ខែឧសភា ឆ្នាំ២០១៨នេះ។

លោកបានឱ្យដឹងថា ការសាងសង់ពង្រីកផ្លូវជាតិលេខ៣នេះ គឺអនុវត្តដោយក្រុមហ៊ុនសាជីវកម្មស្ពាន និងថ្នល់ចិន China Road and Bridge Corporation និងត្រួតពិនិត្យការសាងសង់ដោយក្រុមហ៊ុនទីផ្សារបច្ចេកទេសសំណង់ក្វាងចូវវ៉ានអាន។

រូបគំរូនៃការពង្រីកផ្លូវជាតិលេខ៣ (រូបថត៖ FB សម្តេច ហ៊ុន សែន)

ទោះជាយ៉ាងណា សម្តេចនាយករដ្ឋមន្រ្តី ហ៊ុន សែន បានថ្លែងក្នុងពិធីនោះថា ជាធម្មតាក្រុមហ៊ុនចិន តែងតែកំណត់រយៈពេលវែងក្នុងការសាងសង់ហេដ្ឋារចនាសម្ព័ន្ធនានា ប៉ុន្តែសុទ្ធតែបានធ្វើរួចរាល់មុនកាលកំណត់។

គួរបញ្ជាក់ថា គម្រោងពង្រីកផ្លូវជាតិលេខ៣ នឹងចំណាយថវិកាប្រមាណជាង ២១៩លានដុល្លារ ក្រោមហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ។

គម្រោងពង្រីក និងលើកកម្រិតកំណាត់ផ្លូវជាតិលេខ៣ គឺចាប់ពីរាជធានីភ្នំពេញ (ចោមចៅ) ដល់ក្រុងកំពត ដោយឆ្លងកាត់រាជធានីភ្នំពេញ ប្រវែង ១២គីឡូម៉ែត្រ ខេត្តកណ្តាល ប្រវែង ១១គីឡូម៉ែត្រ ខេត្តកំពង់ស្ពឺ ប្រវែង ៣០គីឡូម៉ែត្រ ខេត្តតាកែវ ប្រវែង ៣០គីឡូម៉ែត្រ និងខេត្តកំពត ប្រវែង ៥១គីឡូម៉ែត្រ។

ការពង្រីកផ្លូវនេះគឺត្រូវបានបែងចែកជា ២កំណាត់ គឺពីចោមចៅ-បែកគូស និងបែកគូស-ក្រុងកំពត។ ផ្លូវពីចោមចៅ ទៅបែកគូស ក្នុងខេត្តតាកែវ ប្រវែង ៦៤,៩០គីឡូម៉ែត្រ នឹងត្រូវពង្រីក ២គន្លងទៅ ៤គន្លង (២ទៅ ២មក) និងមានសួនកណ្តាល។ ចំណែកកំណាត់ផ្លូវពីបែកគូស ទៅក្រុងកំពត ប្រវែងជាង ៦៤គីឡូម៉ែត្រ នឹងត្រូវពង្រីកតួផ្លូវដល់ ១២ម៉ែត្រ ដោយមាន ២គន្លងផ្លូវដដែល (១ទៅ ១មក)៕

អត្ថបទ៖ សំភី