ថៃផលិតប៊ិចពិសេសអាចដឹងច្បាស់ពីភាពទុំនៃទុរេន ១០០%

2018-05-08 01:35:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជំនួសឲ្យការក្រឡុកចុះឡើង និងហិតក្លិន សិស្សថៃចំនួន៣នាក់ បានផលិតសម្រេចនូវប៊ិចពិសេសម្យ៉ាងដែលអាចដឹងពីភាពទុំ ឬខ្ចីរបស់ផ្លែទុរេនបាន។ ការវាស់ស្ទង់ភាពទុំរបស់ស្ដេចផ្លែឈើនេះ គឺមានភាពច្បាស់ការដល់ទៅ ១០០% ឯណោះ។

ផ្លែទុរេន/ រូបភាព៖ Urbanlist

សិស្សទាំង៣រូប ជានិស្សិតមកពីសកលវិទ្យាល័យអប់រំសហគមន៍ និងឧស្សាហកម្ម ស្ថិតនៅឃុំ Bang Saphan ខេត្ត Prachuap Khiri Khan។ ពួកគេមានឈ្មោះ Methee Khampuang, Pantiwa Khamkaew និង Somsong Chaeng-aksorn។ អ្នកទាំង៣បានចំណាយពេលត្រឹមតែ ៣ខែប៉ុណ្ណោះ ក្នុងការច្នៃបង្កើតប៊ិចទំនើបនេះឡើង ដែលនាំឲ្យពួកគេឈ្នះបានពានរង្វាន់មួយនៅកម្មវិធី Junior Inventor VEC Thailand កាលពីខែមីនាកន្លងទៅ។

ប៊ិចអាចវាស់ពីភាពទុំនៃទុរេន/ រូបភាព៖ Thai News Agency

របៀបប្រើប្រាស់ប៊ិចនេះ គឺត្រូវយកវាទៅចាក់ចូលសម្បកទុរេន ដើម្បីស្ទង់មើលសាច់ខាងក្នុង។ ប្រសិនបើទឹកនៅក្នុងប៊ិចឡើងពណ៌បៃតង នោះបញ្ជាក់បានថា ទុរេនគឺទុំ។ ប៉ុន្តែបើវាចេញពណ៌លឿង បានន័យថា វាទុំពាក់កណ្ដាលប៉ុណ្ណោះ។ បើទុរេននោះខ្ចីមិនអាចញ៉ាំកើត វានឹងលោតចេញពណ៌ក្រហម។

សកលវិទ្យាល័យអប់រំសហគមន៍ និងឧស្សាហកម្មថៃ នឹងជួយសិស្សទាំង៣ក្នុងការចុះប៉ាតង់សម្រាប់ប៊ិចដែលពួកគេបង្កើតបាន មុននឹងគម្រោងលក់ប៊ិចនេះក្នុងតម្លៃប្រមាណជា ៣០ដុល្លារក្នុង១ដើម៕