ពលរដ្ឋនៅប៉ោយប៉ែត រិះគន់រឿងអក្សរចិន-ថៃ លេចព្រោងព្រាតលើស្លាកយីហោហាង តែអាជ្ញាធរតបថា...

2018-05-15 03:11:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យ បានរិះគន់ ការដាក់ស្លាកយីហោហាងនានាជាអក្សរចិន ឬ អក្សរថៃ ក្នុងទំហំធំៗ នៅពីលើអក្សរខ្មែរ ឬជួនកាលសរសេរអក្សរចិន ឬ ថៃសុទ្ធ ដោយអត់ដាក់អក្សរខ្មែរតែម្តងក៏មាន។ មន្រ្ដីបានឆ្លើយតបវិញថា ករណីនេះ អាជ្ញាធរបានចុះអប់រំ ណែនាំមួយដងជាពីរដងហើយ តែម្ចាស់ស្លាកយីហោទាំងនោះ មិនស្តាប់ មិនអនុវត្តតាម។

ស្លាកទាំងនោះ ដូចជាហាងអាហារ ផ្ទះសំណាក់ សណ្ឋាគារ ហាងកាហ្វេ ហាងអ៊ីនធឺណែត និងបៀរហ្គាដិន ជាដើម។ ភាគច្រើននៃហាងទាំងនោះ គឺស្ថិតនៅ “តំបន់ប្លុកកាស៊ីណូ និងតាមមាត់អូរព្រំដែនកម្ពុជា ថៃ” នៅក្នុងកាស៊ីណូក្នុងភូមិក្បាលស្ពាន១ នៅម្តុំផ្លូវផ្សារដើមពុទ្រា និងជិតផ្សារប៉ោយប៉ែតថ្មី និងនៅតាមផ្លូវជាតិលេខ៥ ក្នុងភូមិបាលីលេយ្យ១ បាលីលេយ្យ២ ភូមិប៉ោយប៉ែត នៃសង្កាត់-ក្រុងប៉ោយប៉ែត។

លោក សាន ស៊ានហូ អភិបាលក្រុងប៉ោយប៉ែត ធ្លាប់និយាយក្នុងពិធីប្រកាសទទួលស្គាល់ និងសម្ពោធទីស្នាក់ការសមាគមពាណិជ្ជកម្មចិន-កម្ពុជា នៅក្រុងប៉ោយប៉ែតថា អាជ្ញាធរបានណែនាំ ហាមឃាត់ជនជាតិចិនដែលប្រព្រឹត្តល្មើស ឬធ្វើស្លាកយីហោខ្លួនជាអក្សរចិន គ្មានអក្សរខ្មែរ ប៉ុន្តែពេលមានករណីមានការរិះគន់ នាពេលនេះ អាជ្ញាធរបានចុះណែនាំហើយ តែម្ចាស់កន្លែងនៅមិនទាន់អនុវត្តតាម។

ចំពោះលោក ឈឿន សេរីវុធ ប្រធានមន្ទីរទេសចរណ៍ខេត្តបន្ទាយមានជ័យ បានឲ្យដឹងដែរថា តាមច្បាប់មួយរបស់ក្រសួងទេសចរណ៍ បានចែងថា រាល់ស្លាកសញ្ញា យីហោ ទាំងឡាយ ឲ្យសេសេរអក្សរខ្មែរជួរខាងលើ ហើយធំៗ។ បន្ទាប់មកសរសេរអក្សរអង់គ្លេសពីក្រោម ហើយតូចជាងពាក់កណ្តាល និងទើបអាចសរសេរអក្សរបរទេសផ្សេងទៀត (មានអក្សរចិន, ជប៉ុន កូរ៉េ បារាំង ជាដើម) បាន ហើយតូចជាង។

លោកប្រធានមន្ទីរទេសចរណ៍រូបនេះបន្តថា ករណីស្លាកសញ្ញា ស្លាក់យីហោដែលសរសេរអក្សរចិនធំៗ ពីលើអក្សរខ្មែរនៅក្នុងទឹកដីខ្មែរនេះ មន្ទីរបានបញ្ជូនមន្ត្រីទៅពិនិត្យ និងណែនាំឲ្យអ្នកម្ចាស់ដកហូតឬលុបចោល ប៉ុន្តែអាជីវករឬម្ចាស់ទាំងនោះ មិនសហការ និងមិនដកហូតស្លាកទាំងនោះឡើយ។ ក្នុងនោះ ម្ចាស់ហាងខ្លះ បានឌឺដង ព្រហើនដាក់មន្ត្រីសមត្ថកិច្ច និងអាជ្ញាធរថែមទៀត ដោយលើកឡើងថា ការសរសេរអក្សរបរទេស ដើម្បីទាក់ទាញភ្ញៀវទស្សនាច្រើនឡើងៗ។

សូមបញ្ជាក់ថា ជនជាតិចិនក្នុងអាយុពី២០ទៅ៥០ឆ្នាំ បានមកស្នាក់នៅក្រុងប៉ោយប៉ែត នាបច្ចុប្បន្ន មានពី ៣ពាន់ ទៅ ៥ពាន់នាក់៕