មេបក្សកំពុងជាប់ឃុំម្នាក់ ស្នើសុំការលើកលែងទោសពីសម្តេច ហ៊ុន សែន
- 2018-05-16 01:38:53
- ចំនួនមតិ 0 | ចំនួនចែករំលែក 0
មេបក្សកំពុងជាប់ឃុំម្នាក់ ស្នើសុំការលើកលែងទោសពីសម្តេច ហ៊ុន សែន
ចន្លោះមិនឃើញ
អតីតប្រធានគណបក្សអំណាចខ្មែរ លោក សួន សេរីរដ្ឋា បានស្នើសុំសម្ដេចនាយករដ្ឋមន្រ្តី ហ៊ុន សែន ឲ្យលើកលែងទោស ដើម្បីមានសេរីភាពទៅជួបជុំក្រុមគ្រួសារវិញ ក្រោយពីជាប់ពន្ធនាគារអស់រយៈពេលជាច្រើនខែមក។
យោងតាមលិខិតមួយច្បាប់របស់លោក សួន សេរីរដ្ឋា បានផ្ញើជូនសម្ដេច ហ៊ុន សែន កាលពីថ្ងៃទី៣០ ខែមេសា ឆ្នាំ២០១៨ និងចេញផ្សាយជាផ្លូវការកាលពីថ្ងៃទី១៥ ខែឧសភា ឆ្នាំ២០១៨ ឱ្យដឹងថា លោក សួន សេរីរដ្ឋា បានសម្ដែងការសោកស្ដាយ ដែលបានសរសេរនូវសារនយោបាយផ្សាយលើទំព័រហ្វេសប៊ុក កាលពីពេលកន្លងមក ដោយមិនបានពិចារណាឲ្យបានដិតដល់ធ្វើឲ្យប៉ះពាល់យ៉ាងធ្ងន់ធ្ងរ ដល់កិត្តិយសសម្ដេចនាយឧត្ដមសេនីយ៍ផុតលេខផ្កាយមាស៥ និងនាយឧត្ដមសេនីយ៍ ព្រមទាំងឧត្ដមសេនីយ៍ ជាអគ្គបញ្ជាការកងទ័ពទាំងអស់។
លោកបន្ថែមថា៖ «សូមសម្ដេចតេជោ នាយឧត្ដមសេនីយ៍ផុតលេខមេត្តាជួយអន្តរាគមន៍ ស្នើលើកលែងទោសឲ្យខ្ញុំបាទបានរួចផុតពីទោស មានសេរីភាព ដើម្បីវិលទៅជួបគ្រួសារ ថែរក្សាម្ដាយចាស់ជរា ថែរក្សាកូនតូចៗ ធ្វើជាកូនល្អ ជាឪពុកល្អ និងជាស្វាមីល្អ ព្រមទាំងជាពលរដ្ឋល្អ ដោយក្ដីអនុគ្រោះ»។
សូមរំលឹកថា អតីតប្រធានគណបក្សអំណាចខ្មែររូបនេះ ត្រូវបានកម្លាំងសមត្ថកិច្ចចាប់ខ្លួននៅម្តុំព្រែកព្នៅ កាលពីរសៀលថ្ងៃទី១៣ ខែសីហា ឆ្នាំ២០១៧ ក្រោយបង្ហោះសារក្នុងហ្វេសប៊ុក ធ្វើឲ្យប៉ះពាល់ដល់កិត្តិយសកងទ័ព។ បន្ទាប់មកនៅថ្ងៃទី២៥ ខែសីហា ឆ្នាំ២០១៧ លោក រស់ ពិសិដ្ឋ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស លោក សួន សេរីរដ្ឋា ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ១០លានរៀល ពាក់ព័ន្ធការប្រមាថធ្ងន់ធ្ងរដល់កងទ័ពកម្ពុជា ។
ក្នុងសាររបស់ លោក សួន សេរីរដ្ឋា បង្ហោះលើ Facebook កាលពីថ្ងៃទី១២ ខែសីហា ឆ្នាំ២០១៧ មានខ្លឹមសារយ៉ាងដូច្នេះថា៖ «ពេលសង្គ្រាមកើតឡើងជាមួយប្រទេសលាវនោះលទ្ធផល វាហ្នឹងមិនខុសពីសង្គ្រាម ដែលកើតឡើងជាមួយប្រទេសសៀមទេ ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់សប្បាយជាមួយស្រីញី យ៉ាងគគ្រឹកគគ្រេង!។ ពីព្រោះកន្លងមកដូចយើងដឹងហើយ សង្គ្រាមដែលកើតឡើងជាមួយប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ។ ចំណែកឯពួកមេៗ ពាក់ផ្កាយ និងកូនលោកធំៗ ដែលនៅជួរក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ជាមួយស្រីកំដរ ក៏ឡើងបុណ្យឡើងផ្កាយដែរ»៕