កូរ៉េខាងជើងប្រកាសថា មិនចាប់អារម្មណ៍ជំនួបកំពូលជាមួយអាមេរិកទេ ប្រសិនបើ...

2018-05-16 02:52:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Kim Kye-gwan អនុរដ្ឋមន្រ្តីក្រសួងការបរទេសកូរ៉េខាងជើង នៅថ្ងៃទី១៦ ខែឧសភា ២០១៨នេះ បានបញ្ជាក់ថា រដ្ឋាភិបាលក្រុងព្យុងយ៉ាងមិនចាប់អារម្មណ៍ជំនួបកំពូលជាមួយអាមេរិកទេ ប្រសិនបើវាទាមទារឲ្យភាគីតែម្ខាងបោះបង់អាវុធនុយក្លេអ៊ែរ ហើយការដាក់សម្ពាធនៅតែបន្ដ។ នេះបើតាមការចេញផ្សាយរបស់សារព័ត៌មាន Yonhap របស់កូរ៉េខាងត្បូង ចេញផ្សាយនៅមុននេះបន្ដិច។

ការបញ្ជាក់របស់មន្រ្តីការទូតជាន់ខ្ពស់កូរ៉េខាងជើង គឺក្រោយក្រុងព្យុងយ៉ាងសម្រេចលុបចោលជំនួបចរចាកម្រិតខ្ពស់មួយជាមួយកូរ៉េខាងត្បូង និងគំរាមលុបចោលគម្រោងចរចារវាងប្រធានាធិបតីអាមេរិក ដូណាល់ ត្រាំ និងមេដឹកនាំ កូរ៉េខាងជើង គីម ជុងអ៊ុន នៅព្រឹកថ្ងៃទី១៦ ខែឧសភា ២០១៨នេះ។ ការលុបចោលនេះ គឺក្រោមមូលហេតុសមយុទ្ធទ្រង់ទ្រាយធំរួមគ្នារវាងកងទ័ពអាមេរិក និងកូរ៉េខាងត្បូង ដែលកំពុងបន្ដធ្វើឡើងនៅឧបទ្វីបកូរ៉េ។

សូមបញ្ជាក់ថា តាមគម្រោងជំនួបកំពូលរវាងលោក ត្រាំ និងលោក គីម ជុងអ៊ុន នឹងធ្វើឡើងនៅក្នុងប្រទេសសិង្ហបុរី នៅថ្ងៃទី១២ ខែមិថុនា ២០១៨ ខាងមុខនេះ៕