សមាគមគ្រឹះស្ថានឧត្តមសិក្សា ប្រកាសចូលរួមសង្កេតការណ៍បោះឆ្នោត ខណៈអង្គការធំ២មិនចូលរួម

2018-05-17 01:48:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សមាគមគ្រឹះស្ថានឧត្តមសិក្សាកម្ពុជា បានប្រកាសបញ្ជូនសមាជិកប្រមាណ ២ពាន់នាក់ ដើម្បីចូលរួមធ្វើជាអ្នកសង្កេតការណ៍បោះឆ្នោតជ្រើសរើសតំណាងរាស្ត្រ សម្រាប់នីតិកាលទី៦ ដែលប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។ នេះបើតាមការបញ្ជាក់ពីលោក ឌឹម សុវណ្ណារុំ សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី១៦ ខែឧសភា ឆ្នាំ២០១៨។

សេចក្តីប្រកាសរបស់អ្នកនាំពាក្យខាងលើនេះ បានធ្វើឡើង ខណៈដែលអង្គការខុមហ្វ្រែល និងអង្គការនិចហ្វ្រិក បានប្រកាសមិនចូលរួមសង្កេតការណ៍ក្នុងការបោះឆ្នោតជ្រើសតាំងតំណាងរាស្ត្រ ខាងមុខនេះឡើយ។ មូលហេតុ អង្គការឃ្លាំមើលការបោះឆ្នោតទាំងពីរនេះ អះអាងថា មិនមានអតីតគណបក្សប្រឆាំង ចូលរួមក្នុងការបោះឆ្នោតខាងមុខនេះឡើយ។

ប្រជាពលរដ្ឋចូលរួមបោះឆ្នោតឃុំសង្កាត់ឆ្នាំ២០១៧ នៅមណ្ឌល១កន្លែង ក្នុងរាជធានីភ្នំពេញ

គួរបញ្ជាក់ថា សមាគមគ្រឹះស្ថានឧត្តមសិក្សាកម្ពុជា មាន ៩៦គ្រឹះស្ថាន ដោយមានទីតាំងគោល និងសាខានៅគ្រប់ ២៥ រាជធានី-ខេត្ត។

លោក ឌឹម សុវណ្ណារុំ បន្ថែមថា ក្នុងការចូលរួមសង្កេតការណ៍លើដំណើរការបោះឆ្នោតខាងមុខនេះ សមាគមគ្រឹះស្ថានឧត្តមសិក្សាកម្ពុជា ដឹកនាំដោយលោកបណ្ឌិត ហេង វណ្ណដា គ្រោងនឹងចំណាយថវិកាជិត ២០ម៉ឺនដុល្លារ ដែលសមាជិកសមាគមចូលរួមដោយស្ម័គ្រចិត្ត។

លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សាកម្ពុជា បានថ្លែងប្រាប់ខ្លីៗ កាលពីរសៀលថ្ងៃទី១៦ ខែឧសភាថា ការដាក់សមាជិកប្រមាណ ២ពាន់នាក់ ចូលរួមសង្កេតការណ៍បោះឆ្នោតនាពេលខាងមុខនេះ គឺដើម្បីចូលរួមចំណែកជួយសង្គម មានន័យថា ចូលរួមជាមួយ គ.ជ.ប ដើម្បីធ្វើយ៉ាងណា ឱ្យការបោះឆ្នោតប្រព្រឹត្តដោយរលូន យុត្តិធម៌ ត្រឹមត្រូវ សន្តិភាព និងសុខមាលភាពជូនដល់ប្រជាពលរដ្ឋ ព្រមទាំងអាចទទួលយកបានផងដែរ។

អគារសមាគមគ្រឹះស្ថានឧត្តមសិក្សាកម្ពុជា (រូបថត៖ FB សមាគមគ្រឹះស្ថានឧត្តមសិក្សាកម្ពុជា)

ប្រធានសមាគមរូបនេះ បានបញ្ជាក់ថា អ្នកសង្កេតការណ៍ប្រមាណជាង ២ពាន់នាក់ នឹងត្រូវដាក់នៅទាំង២៥រាជធានី-ខេត្ត។

ចំណែកលោក ភឹម មុនីសេដ្ឋា អគ្គលេខាធិការសមាគមគ្រឹះស្ថានឧត្តមសិក្សាកម្ពុជា បានបញ្ជាក់យ៉ាងខ្លីថា ការចូលរួមដាក់អ្នកសង្កេតការណ៍ ចូលរួមដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ ជាសុឆន្ទៈរបស់សមាគម ក្នុងបុព្វហេតុស្នេហាជាតិ។

សូមរម្លឹកថា កាលពីពេលបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃទី២៥ ខែកុម្ភៈ ឆ្នាំ២០១៨ សមាគមគ្រឹះស្ថានឧត្តមសិក្សាកម្ពុជា បានដាក់ពង្រាយអ្នកសង្កេតការណ៍ ដែលជាសមាជិកសមាគមផងដែរ៕

អត្ថបទ៖ សំភី