ក្រសួងវប្បធម៌ ធ្វើវីដេអូបង្ហាញតំបន់ប្រវត្តិសាស្រ្ត១ ដែលលាក់ខ្លួនយ៉ាងជ្រៅក្នុងព្រៃភ្នំគូលែន
- 2018-05-17 09:21:15
- ចំនួនមតិ 0 | ចំនួនចែករំលែក 0
ក្រសួងវប្បធម៌ ធ្វើវីដេអូបង្ហាញតំបន់ប្រវត្តិសាស្រ្ត១ ដែលលាក់ខ្លួនយ៉ាងជ្រៅក្នុងព្រៃភ្នំគូលែន
ចន្លោះមិនឃើញ
ក្រសួងវប្បធម៌ និងវិចិត្រសិល្បៈ កំពុងធ្វើវីដេអូឯកសារបង្ហាញពីតំបន់ប្រវត្តិសាស្រ្ត ស្រះដំរី ដែលស្ថិតនៅលើភ្នំគូលែន ដើម្បីផ្សព្វផ្សាយឲ្យសាធារណៈបានស្គាល់ បានដឹងពីជំនឿវប្បធម៌ និងប្រវត្តិនៅក្នុងតំបន់ដ៏ស្រស់ត្រកាល១នេះ។ នេះតាមការបញ្ជាក់លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌។
លោក ប៉ុក បូរក្ស បាននិយាយថា គម្រោងវីដេអូឯកសារនេះ គឺមានរយៈពេល១៥ ទៅ២០នាទី។ លោកបានបញ្ជាក់ បុរាណដ្ឋានមួយនេះពិបាកក្នុងការធ្វើដំណើរចូលទៅដល់បន្តិច ព្រោះត្រូវជិះឡាន ម៉ូតូ និងដើរកាត់ព្រៃជាដើម។ លោកបន្តថា ទម្រាំតែអាចផ្ដិតយករូបភាពបុរាណដ្ឋានដែលមានអាយុកាលរាប់ពាន់ឆ្នាំនេះ គឺត្រូវធ្វើដំណើរដល់ទៅ៣លើក ព្រោះនៅតំបន់ភ្នំតែងមានភ្លៀងធ្លាក់ញឹកញាប់។
ការលះបង់ ការតស៊ូជំនះការលំបាក និងការតាំងចិត្តដ៏មោះមុត របស់ក្រុមការងារក្នុងការផលិតវីដេអូនេះ លោកសង្ឃឹមថា នឹងអាចជាចំណែកធ្វើឲ្យមានការចាប់អារម្មណ៍ទៅទស្សនាតំបន់ដ៏ប្រសិទ្ធនេះ ទាំងភ្ញៀវជាតិ និងអន្តរជាតិ។
រមណីយដ្ឋានស្រះដំរី មានចម្លាក់ថ្មភ្នំ មានរូបសត្វដំរីដ៏ធំ បែរមុខទៅទិសខាងលិចដែលមានស្រះទឹកនៅពីមុខ និងមានចម្លាក់សត្វកង្កែប តោ គោ ខ្លា នៅជិតគ្នា។ តាមអ្នកស្រាវជ្រាវជនជាតិបារាំង លោក ប៊ូល បេ (Boul Bet) សន្និដ្ឋានថា តំបន់នេះអាចមានកើតឡើងក្នុងសតវត្សទី ៩ ។ ប៉ុន្តែបើតាមសិលាចារិក ដែលបានចារក្រោមរូបសត្វដំរី មួយឃ្លាថា "ឥន្ទ្រតបតិសីហ" បង្ហាញថា អក្សរនេះមានអាយុកាលមុនសម័យអង្គរ ប្រហែលជាកើតឡើងក្នុង សតវត្សទី៨ ហើយពាក្យនេះ អាចសម្គាល់ដល់ឈ្មោះ ព្រះមហាក្សត្រ ឬជាឈ្មោះ អ្នកណាម្នាក់ដែលគេហៅថា "សីហ" ឬក៏អាចជាឈ្មោះតំបន់នេះពីសម័យមុនក៏ថាបាន៕