ករណីវិវាទដីធ្លីនៅកោះកុង៖ ក្រសួងដែនដី ចាត់ក្រុមការងារឱ្យចុះទៅពិនិត្យដោះស្រាយហើយ
- 2018-05-18 09:53:48
- ចំនួនមតិ 0 | ចំនួនចែករំលែក 0
ករណីវិវាទដីធ្លីនៅកោះកុង៖ ក្រសួងដែនដី ចាត់ក្រុមការងារឱ្យចុះទៅពិនិត្យដោះស្រាយហើយ
ចន្លោះមិនឃើញ
ក្រសួងរៀបចំដែនដី នគររូបនីយកម្ម និងសំណង់ បានចាត់ក្រុមការងារ ឱ្យចុះសហការជាមួយអាជ្ញាធរខេត្តកោះកុង ដើម្បីពិនិត្យអត្តសញ្ញាណអ្នកកាន់កាប់ និងដី ពាក់ព័ន្ធនឹងករណីជម្លោះដីធ្លីរវាងប្រជាពលរដ្ឋនៅស្រុកស្រែអំបិល និងស្រុកបុទុមសាគរ ជាមួយក្រុមហ៊ុន Koh Kong Plantation Co., Ltd និងក្រុមហ៊ុន Koh Kong Sugar Industry Co., Ltd។ នេះបើតាមសេចក្តីប្រកាសព័ត៌មានរបស់ក្រសួងដែនដី នៅថ្ងៃទី១៨ ខែឧសភា ឆ្នាំ២០១៨នេះ។
ការចុះពិនិត្យនេះ នឹងធ្វើឡើងចាប់ពីថ្ងៃទី២១ ខែឧសភា ឆ្នាំ២០១៨ រហូតរួចរាល់ជាស្ថាពរ ឈានទៅដល់ការដោះស្រាយបញ្ចប់។
សូមបញ្ជាក់ថា ករណីវិវាទដីធ្លីនេះ បានកើតឡើងតាំងពីឆ្នាំ២០០៦មកម្ល៉េះ។ រហូតមកដល់ខែមីនា ឆ្នាំ២០១៨កន្លងទៅ ក្នុងកិច្ចប្រជុំ១នៅក្រសួងដែនដី ប្រជាពលរដ្ឋចំនួន ៣៧៥គ្រួសារ ក្នុងឃុំជី ខ លើ បានយល់ព្រមទទួលយកដំណោះស្រាយពីក្រុមហ៊ុនខាងលើនេះហើយ។
ដោយឡែកប្រជាពលរដ្ឋ១ក្រុមទៀតនៅក្នុងឃុំនេះប្រមាណ ៣០២គ្រួសារ ដែលមិនទាន់ទទួលបានដំណោះស្រាយ បានមកសុំអន្តរាគមន៍ពីក្រសួងដែនដី តាំងពីដើមខែឧសភា។ ក្រោយការប្រកាសរបស់ក្រសួងខាងលើនេះ ពួកគេបានយល់ព្រមត្រឡប់ទៅខេត្តកោះកុងវិញ ដើម្បីរង់ចាំក្រុមការងាររបស់ក្រសួង ចុះទៅដោះស្រាយ៕