ក្រសួងកសិកម្ម បំភ្លឺរឿងគម្រោងវិនិយោគរបស់ក្រុមហ៊ុនវៀតណាម នៅកម្ពុជា

2018-05-18 12:26:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា អ្នកវិនិយោគវៀតណាម គ្រាន់តែបង្ហាញពីគោលបំណងនៃការបោះទុនវិនិយោគលើវិស័យកសិកម្មផ្នែកដំណាំស្បៀងសុវត្ថិភាពតែប៉ុណ្ណោះ។ នេះបើតាមសេចក្តីប្រកាសព័ត៌មានរបស់ក្រសួងកសិកម្ម នៅថ្ងៃទី១៨ ខែឧសភា ឆ្នាំ២០១៨នេះ។

ការចេញសេចក្តីបំភ្លឺនេះ គឺក្រោយពេលដែលអ្នកជំនាញកសិកម្ម និងក្រុមអ្នកឃ្លាំមើលបញ្ហាសង្គមក៏ដូចជាអ្នកប្រើប្រាស់បណ្តាញសង្គមហ្វេសប៊ុកមួយចំនួន បានបង្ហាញក្តីបារម្ភ ស្តីពីគម្រោងវិនិយោគរបស់ក្រុមហ៊ុនកសិកម្មវៀតណាម នៅកម្ពុជា។ ការបង្ហាញក្តីបារម្ភនេះ បានធ្វើឡើងបន្ទាប់ពីក្រុមហ៊ុនធំមួយរបស់វៀតណាម គឺក្រុមហ៊ុន FLC Group ចង់បោះទុនជាទឹកប្រាក់ប្រមាណ១ពាន់លានដុល្លារ នៅឆ្នាំ២០១៩ខាងមុខ វិនិយោគលើការដាំដុះបន្លែ និងផ្លែឈើសម្រាប់នាំចេញ និងផ្គត់ផ្គង់ទេសចរក្នុងស្រុក។ គម្រោងនេះត្រូវបានបង្ហាញក្នុងជំនួបរវាងលោក វេង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងប្រតិភូក្រុមហ៊ុនវៀតណាម FVC Group កាលពីថ្ងៃទី១០ ខែឧសភាកន្លងទៅ។

រដ្ឋមន្រ្តីក្រសួងកសិកម្ម ក្នុងជំនួបពិភាក្សាជាមួយប្រតិភូក្រុមហ៊ុនវៀតណាម FLC Group កាលពីថ្ងៃទី១០ ខែឧសភា ឆ្នាំ២០១៨ នៅទីស្តីការក្រសួង។ រូបថត៖ FB ក្រសួងកសិកម្ម

ក្រសួងកសិកម្ម បានហៅការបារម្ភទាំងនេះថា ជាការវិភាគមិនទាន់គ្រប់ជ្រុងជ្រោយ និងស្វែងយល់ឱ្យបានស៊ីជម្រៅពីគោលបំណងវិនិយោគនេះនៅឡើយទេ។

ក្រសួងពន្យល់ថា ប្រសិនបើគម្រោងនេះដំណើរការ ក្រុមហ៊ុនវៀតណាម នឹងសហការជាមួយកសិករដាំបន្លែ ផ្លែឈើ សហគមន៍កសិកម្មក្នុងស្រុក ដើម្បីធ្វើការផលិតតាមគោលការណ៍កសិកម្មសរីរាង្គ សម្រាប់ផ្គត់ផ្គង់សណ្ឋាគារ កន្លែងលម្ហែកាយ ទាំងនៅកម្ពុជា និងវៀតណាម។ ក្រុមហ៊ុន នឹងរៀបចំកសិដ្ឋានដាំដុះគំរូ ដើម្បីបង្ហាញឱ្យកសិករធ្វើការដាំដុះ តាមបទដ្ឋានបច្ចេកទេសសមស្រប ពូជមានទិន្នផលខ្ពស់ ហើយក្រុមហ៊ុននឹងប្រមូលទិញមកវិញ ដើម្បីបំពេញតម្រូវការទីផ្សារតាមគោលបំណងខាងលើនេះ។

កសិករក្នុងស្រុកម្នាក់ កំពុងបេះបន្លែ ក្នុងចម្ការ

ក្រសួងកសិកម្មបន្តថា គម្រោងនេះ មិនទាន់ត្រូវបានចាប់ផ្តើមឡើយ ដោយសារតែអ្នកវិនិយោគ មិនទាន់ធ្វើការសិក្សាបានច្បាស់លាស់ស្តីពីផែនការលើការបោះទុនវិនិយោគនេះនៅឡើយ។

ក្រសួងបន្ថែមថា តាមគោលការណ៍របស់រាជរដ្ឋាភិបាល ក្រុមហ៊ុនត្រូវលើកសំណើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា ដោយត្រូវដាក់ឆ្លងកិច្ចប្រជុំអន្តរក្រសួងពិនិត្យ និងការវាយតម្លៃផលប៉ះពាល់នៃគម្រោងវិនិយោគ ព្រមទាំងត្រូវមានការសម្រេចពីរាជរដ្ឋាភិបាលផងដែរ៕

អត្ថបទពាក់ព័ន្ធ៖ អ្នកជំនាញ ប្រតិកម្មនឹងគម្រោងវិនិយោគរបស់ក្រុមហ៊ុនកសិកម្មវៀតណាម

អត្ថបទ៖ សំភី