សមត្ថកិច្ចចាប់ពោះវៀនតាន់ កន្សោមដោះគោ សត្វឌុកឌឿ ចង្រិត និងកន្តេះឡង់ ដែលនាំចូលពីថៃ

2018-05-18 13:42:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពោះវៀនតាន់ កន្សោមដោះគោ សត្វឌុកឌឿ សត្វចង្រិតតូច ចង្រិតធំ និងសត្វកន្តេះឡង់ សរុបប្រមាណ ១តោន ដែលដឹកតាមរថយន្តក្រុង នាំចូលមកពីប្រទេសថៃ ត្រូវបានកម្លាំងនគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ មន្រ្តីកាំកុងត្រូល ចុះចាប់ កាលពីព្រឹកថ្ងៃទី១៨ ខែឧសភា ឆ្នាំ២០១៨។ ការបង្រ្កាបនេះ ធ្វើឡើងនៅក្នុងរថយន្តក្រុង និងរថយន្តយីឌុប នៅផ្លូវលេខ៤៨៣ សង្កាត់ទួលស្វាយព្រៃ២ ខណ្ឌចំការមន។

ពោះវៀនតាន់ កន្សោមដោះគោ សត្វឌុកឌឿ សត្វចង្រិតតូច ចង្រិតធំ និងសត្វកន្តេះឡង់ ដែលសមត្ថកិច្ចបានរឹបអូស កាលពីព្រឹកថ្ងៃទី១៨ ខែឧសភា ឆ្នាំ២០១៨។

លោកឧត្តមសេនីយ៍ទោ ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បានថ្លែងឲ្យដឹងថា បន្ទាប់ពីបានធ្វើការតាមដានតាំងពីយប់រហូតដល់ព្រឹក ទើបក្រុមការងារធ្វើការចុះទៅឆែកឆេររថយន្តខាងលើនេះតែម្តង។ ក្រោយឆែកឆេរ គឺបានរកឃើញសាច់៦មុខដូចជា ឌុកឌឿ ចង្រិតតូច ពោះវៀនតាន់ កន្សោមដោះគោ ចង្រិតធំ កន្តេះឡង់ នាំចូលពីប្រទសថៃ ដែលពុំមានច្បាប់អនុញ្ញាតនោះទេ។

លោកបានបញ្ជាក់ថា បន្ទាប់ពីធ្វើការរឹបអូស ក្រុមការងាររបស់លោក នឹងយកទៅដុតកម្ទេចចោលភ្លាមៗនៅទីលានដុតសំរាមជើងឯកតែម្តង។

ចំណែកលោក គង់ វុទ្ធី អនុប្រធានសាខាកាំកុងត្រូលផែស្ងួតចុងទីភ្នំពេញបានឲ្យដឹងថា សាច់ និងសត្វល្អិតទាំងនេះ គឺនាំចូលដោយគ្មានច្បាប់អនុញ្ញាត ហើយការវេចខ្ចប់មិនស្អាត និងគ្មានអនាម័យឡើយ។ យ៉ាងណាក៏ដោយក្រុមការងារចម្រុះ មិនបានឃាត់ខ្លួនម្ចាស់នាំចូលទំនិញនេះទេ ដោយគ្រាន់តែធ្វើកិច្ចសន្យាបញ្ឈប់ការនាំចូលតែប៉ុណ្ណោះ៕