កម្លាំងសំខាន់៣នាក់របស់ទ័ព ត្រូវអវត្តមានពេលជួបវិសាខារសៀលនេះ

2018-05-19 03:22:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបក្រសួងការពារជាតិ នឹងគ្មានកីឡាករបរទេសសំខាន់ៗដល់ទៅ៣នាក់ នៅពេលធ្វើជាភ្ញៀវទៅស្វែងរក៣ពិន្ទុពីម្ចាស់ផ្ទះជាចំណូលថ្មីវិសាខា សប្តាហ៍ទី៦នៃលីគកំពូលកម្ពុជា នៅកីឡដ្ឋានវេស្ទើនវេលាម៉ោង៣រសៀល ថ្ងៃទី១៩ ឧសភានេះ។

លោក ភា សុភ័ត្ត្រា និងកូនក្រុម នៅពហុកីឡដ្ឋានជាតិ នាពេលកន្លងទៅ

តាមការឲ្យដឹងពីលោក ភា សុភ័ត្ត្រា គ្រូបង្គោលក្រសួងការពារជាតិ កីឡាករខ្សែបម្រើលេខ៦ជនជាតិជប៉ុន Yudia Ogawa មិនអាចលេងបានទេសប្តាហ៍នេះដោយសារជាប់ពិន័យ១ប្រកួត។ កីឡាករជប៉ុនរូបនេះជាអ្នករកគ្រាប់បាល់បានច្រើនឲ្យក្រុមទ័ព៥សប្តាហ៍កន្លងទៅ។ ថ្វីបើលេងក្នុងតំណែងបម្រើ Ogawa រកបាល់បាន៤គ្រាប់ក្នុងនោះសប្តាហ៍ទី១ស៊ុតចូលអង្គរថាយហ្គឺរ១គ្រាប់ សប្តាហ៍ទី៣ស៊ុតចូលអាស៊ីអឺរ៉ុប១គ្រាប់ និងសប្តាហ៍ទី៤ស៊ុតចូលវេស្ទើនភ្នំពេញ២គ្រាប់។

ក្រៅពីបាត់បង់កីឡាករជប៉ុនសំខាន់ខាងលើ ខ្សែការពារសញ្ជាតិកូរ៉េខាងត្បូងលេខ២០ Yoo Jae-ho ក៏មិនអាចលេងបានដែរដោយសារមានជំងឺគ្រុនឈាម។ ចំណែកកីឡាករជប៉ុនលេខ៨ត្រូវបានក្លឹបបញ្ឈប់កិច្ចសន្យាបាត់ហើយ ដូច្នេះការប្រកួតថ្ងៃនេះក្រសួងការពារជាតិមានកីឡាករបរទេសតែ២នាក់គឺលេខ៩ខ្សែប្រយុទ្ធកូរ៉េ Na Hyo-sang និងលេខ១០ខ្សែប្រយុទ្ធកូរ៉េ Song Chi-hun។

ស្ថិតិ៥ប្រកួតក្នុងលីគកន្លងទៅ ក្រសួងការពារជាតិឈ្នះ៣ និងចាញ់២ដោយមាន៩ពិន្ទុស្ថិតនៅចំណាត់ថ្នាក់លេខ៥។ សប្តាហ៍ទី១ ឈ្នះ អង្គរថាយហ្គឺរ ១-០, សប្តាហ៍ទី២ ចាញ់ ភ្នំពេញក្រោន ២-០, សប្តាហ៍ទី៣ ឈ្នះ អាស៊ីអឺរ៉ុប ២-១, សប្តាហ៍ទី៤ ឈ្នះ វេស្ទើនភ្នំពេញ ៨-០ និងសប្តាហ៍ទី៥ ចាញ់ បឹងកេត ២-០៕

ប្រភព៖ Sabay News អត្ថបទ៖ ជាន ចាន់រ៉ា