ក្រសួងប្រកាសមិនឲ្យប្រើប្រាស់ថ្នាំបង្កើនតណ្ហាបុរស KINGMAN ដែលអាចនាំឲ្យគាំងបេះដូង

2018-05-19 04:20:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសុខាភិបាល កាលពីថ្ងៃទី១៨ ខែឧសភា ឆ្នាំ២០១៨ បានចេញសេចក្ដីជូនដំណឹងដល់សាធារណជន ឲ្យមានការប្រុងប្រយ័ត្នខ្ពស់ចំពោះឱសថបង្កើនតណ្ហាបុរស ឈ្មោះ KING MAN ផលិតនៅអាមេរិក ដែលគ្មានក្រុមហ៊ុននាំចូលត្រឹមត្រូវ គ្មានចុះបញ្ជិកា គ្មានការត្រួតពិនិត្យ និងគ្មានការអនុញ្ញាតឲ្យផ្សព្វផ្សាយពីក្រសួង។

ឱសថ KING MAN

សេចក្ដីជូនដំណឹងនេះ ត្រូវធ្វើឡើងបន្ទាប់ពីមានការផ្សព្វផ្សាយឱសថ KING MAN តាមបណ្ដាញសង្គមហ្វេសប៊ុក ដោយគណនី "មន្តស្នេហ៍បុរស", “Mona Lika” និង "A NY FC” ដោយបំផ្លើសហួសពីការពិត ដូចជាការបង្កើនតណ្ហាផ្លូវភេទបុរស ជួយសម្រួលក្រពេញប្រូស្តាត ជួយព្យាបាលជំងឺតម្រងនោម ជំងឺទឹកនោមផ្អែម ជំងឺទឹកនោមប្រៃ និងជំងឺលើសឈាមជាដើម។

ក្រសួងបន្តថា ការប្រើប្រាស់ឱសថខាងលើអាចនាំឲ្យប៉ះពាល់ដល់សុខភាព ឬអាចឈានដល់បាត់បង់អាយុជីវិត ដោយសារគាំងបេះដូង។ ក្រសួងនឹងមានវិធានការទៅតាមផ្លូវច្បាប់ចំពោះម្ចាស់គណនីមួយចំនួន ដែលនាំចូល ផ្សព្វផ្សាយ លក់ ឬចែកចាយឱសថ KING MAN ។

ក្រសួងសុខាភិបាល បានអំពាវនាវដល់ប្រជាពលរដ្ឋ ដែលជួបប្រទះជនណាដែលកំពុងប្រើប្រាស់ លក់ ចែកចាយ ផលិតផលឱសថ KING MAN ផ្ដល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង ដោយទាក់ទងតាមរយៈលេខទូរសព្ទ ០១១ ៥៧៤ ៧៨៧, ០៩៥ ៣៥៩ ៣៩៩, ០១២ ៩៨៣ ៣៣៤ និង ០១២ ៨៩២ ០២២ ៕

អត្ថបទ៖ លាភ.