ក្រសួងផែនការ បង្ហាញភាពជោគជ័យ៦ចំណុចរបស់កម្ពុជា ដែលត្រូវបានទទួលស្គាល់ជាសកល
- 2018-05-20 03:57:06
- ចំនួនមតិ 0 | ចំនួនចែករំលែក 0
ក្រសួងផែនការ បង្ហាញភាពជោគជ័យ៦ចំណុចរបស់កម្ពុជា ដែលត្រូវបានទទួលស្គាល់ជាសកល
ចន្លោះមិនឃើញ
ក្នុងពិធីបើកកិច្ចប្រជុំអន្តរក្រសួងដើម្បីណែនាំពីគោលការណ៍រៀបចំធាតុចូលសម្រាប់រៀបចំ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ នៅសណ្ឋាគារភ្នំពេញ កាលពីថ្ងៃទី១៦ ខែឧសភា ឆ្នាំ២០១៨ លោក ឆាយ ថន រដ្ឋមន្រ្តីក្រសួងផែនការ បានបង្ហាញ ៦ចំណុចដែលរាជរដ្ឋាភិបាលកម្ពុជា សម្រេចបាន ហើយត្រូវបានទទួលស្គាល់ជាសកល។
១. ប្រជាជនកម្ពុជាបានរស់នៅក្នុងសន្តិភាពពេញលេញ គ្មានការភ័យខ្លាច។
២. ពីប្រទេសដែលត្រូវបានគេមកជួយដោះស្រាយទំនាស់ផ្ទៃក្នុង ពេលនេះបាន បញ្ជូនមន្រ្តីរបស់កម្ពុជា ទៅជួយបណ្តាប្រទេសមួយចំនួនវិញ និងក្លាយជា ម្ចាស់ផ្ទះក្នុងការរៀបចំកិច្ចប្រជុំធំៗជាច្រើនដែលមានមេដឹកនាំប្រទេសមហាអំណាចទាំងអស់ លើសកលលោកមកចូលរួម។
៣. ពីប្រទេសដែលខ្វះស្បៀងអាហារ ទៅជាប្រទេសនាំស្បៀងទៅផ្តត់ផ្គង់ទីផ្សារក្រៅប្រទេស។
៤. ពីប្រទេសដែលមានការភ័យខ្លាច ទៅជាប្រទេសដែលកំពុងទាក់ទាញទេសចរដ៏ច្រើនមកទស្សនា និងស្នាក់នៅ និងអាចដើរហើរគ្រប់ទីកន្លែងនិងគ្រប់ពេលវេលា។
៥. ពីប្រទេសដែលប្រជាជនមានប្រាក់ចំណូលទាបប្រមាណ ២០០ដុល្លារអាមេរិក នៅក្នុង ទស្សវត្សរ៍ឆ្នាំ២០០០ កើនមកដល់ប្រមាណជិត ១៥០០ដុល្លារអាមេរិក ក្នុងឆ្នាំ២០១៧ ជាពិសេស បានឈានដល់ប្រទេសមានចំណូលមធ្យមកម្រិតទាប។
និង ៦. ពីប្រទេសដែលប្រជាជនរស់នៅក្រោមខ្សែបន្ទាត់ភាពក្រីក្ររង្វង់៥០% នៅក្នុងឆ្នាំ២០០៧ ធ្លាក់មកទាបជាង ១៣,៥% នៅក្នុងឆ្នាំ២០១៤ និងបន្តធ្លាក់ចុះជាបន្តទៀត។
ក្រសួងផែនការ បានបញ្ជាក់ថា ផែនការយុទ្ធសាស្រ្តអភិវឌ្ឍន៍ជាតិ (ផ.យ.អ.ជ.) ២០១៩-២០២៣ គឺជាឯកសារដ៏សំខាន់មួយរបស់រាជរដ្ឋាភិបាលកម្ពុជា ដែលនឹងបង្ហាញលម្អិតនូវសកម្មភាព កម្មវិធី និង គម្រោងសំខាន់ៗ សំដៅធ្វើឲ្យបានសម្រេចនូវបណ្ដាគោលដៅអាទិភាពរបស់ជាតិ ដូចមានចែងនៅក្នុងយុទ្ធសាស្ដ្រចតុកោណ៕