អភិបាលខេត្តរតនគិរី ស្នើឱ្យចិន ចូលមកវិនិយោគលើការកែច្នៃផលិតផលសម្រេច

2018-05-20 13:27:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ថង សាវុន អភិបាលខេត្តរតនគិរី បានស្នើឱ្យភាគីចិន ចូលមកវិនិយោគលើការកែច្នៃផលិតផលសម្រេចសម្រាប់ការនាំចេញ និងជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ទេសចរណ៍ វប្បធម៌ អប់រំ ឱ្យកាន់តែប្រសើរឡើងថែមទៀត។ សំណើនេះ ធ្វើឡើងក្នុងអំឡុងពេលលោកទទួលជួបប្រតិភូទីក្រុងខុងជ័រ ខេត្តក្វាងស៊ី ប្រទេសចិន កាលពីរសៀលថ្ងៃទី២០ ខែឧសភា ឆ្នាំ២០១៨ នៅខេត្តរតនគិរី។

ប្រតិភូក្រុងខុងជ័រ ខេត្តក្វាងស៊ី ក្នុងជំនួបជាមួយអភិបាលខេត្តរតនគិរី កាលពីរសៀលថ្ងៃទី២០ ខែឧសភា ឆ្នាំ២០១៨។ រូបថត៖ FB រដ្ឋបាលខេត្តរតនគិរី

លោកអភិបាលខេត្ត បានជម្រាបជូនគណៈប្រតិភូចិន អំពីសក្តានុពលខេត្តរតនគិរី ដែលសម្បូរទៅដោយសម្បត្តិធម្មជាតិ ពិសេសស្ថានភាពផ្ទៃដីអំណោយផលខាងវិស័យកសិកម្ម និងកសិឧស្សាហកម្ម។ ជាមួយគ្នានេះ ខេត្តរតនគិរី ក៏មានក្រុមហ៊ុនវិនិយោគដីសម្បទានសេដ្ឋកិច្ចចំនួន ២៥ក្រុមហ៊ុន និងក្រុមហ៊ុនវិនិយោគលើការកែច្នៃកៅស៊ូ ដំឡូងមី និងផលិតផលផ្សេងៗទៀតផងដែរ។

ជាការឆ្លើយតប លោក វ៉ាន ចុងស៊ីង អនុប្រធានគណៈកម្មាធិការអចិន្ត្រៃយ៍ នៃសភាប្រជាជនក្រុងចុងជ័រ ដែលជាអ្នកដឹកនាំគណៈប្រតិភូ បានបញ្ជាក់ថា លោកនឹងជំរុញអ្នកវិនិយោគឯកជនបន្ថែមទៀត ឱ្យមកវិនិយោគនៅខេត្តរតនគិរីផ្ទាល់។

លោកក៏បានជំរុញឱ្យមានទស្សនកិច្ចសិក្សាលើការងារបេតិកភណ្ឌ ស្វែងយល់អំពីប្រព័ន្ធនៃការគ្រប់គ្រងរដ្ឋបាល ការរក្សាគ្រប់គ្រងតំបន់អភិរក្ស និងការងារជំរុញការអភិវឌ្ឍប្រកបដោយចីរភាព ដោយជំរុញការផ្លាស់ប្តូរគ្រប់វិស័យ ជាពិសេសជំរុញឱ្យយុវជនបន្តវេន ផ្លាស់ប្តូរវប្បធម៌នៃខេត្តទាំងពីរ៕

អត្ថបទ៖ សំភី