ខ្សែបម្រើជើងចាស់ Andres Iniesta បានប​ញ្ចប់​អាជីព​នៅ​ Barcelona ហើយ ក្រោយ​ឈ្នះ​ពាន​ធំៗជាច្រើន ក្នុង​រយៈពេល ២២ឆ្នាំ នៅ​ក្នុង​ក្រុម​ Barcelona តាំងពី​យុវជន​មក។

ប្រកួត​ចុងក្រោយ​របស់​កីឡាករ​វ័យ ៣៤ឆ្នាំ​រូបនេះ គឺក្លឹប​អ្នក​មាន​បុណ្យ បាន​យក​ឈ្នះ Real Sociedad ១-០ កាលពីយប់មិញ។

Iniesta បាននិយាយ​ទាំង​ទឹកភ្នែកថា៖ "វាជា​ ២២ឆ្នាំ​ដ៏​អស្ចារ្យ និងជាកិត្តិយសបំផុត​ដែលខ្ញុំ​អាច​លេង​​នៅ​ទីនេះ។ សម្រាប់ខ្ញុំ Barcelona គឺជាក្លឹប​ល្អបំផុត​ក្នុង​លោក។ ខ្ញុំសូមអរគុណ​មិត្ត​រួមក្រុម និងអ្នកគាំទ្រ​ទាំងអស់គ្នា។ ទោះ​ខ្ញុំត្រូវ​ចាកចេញ​ក្នុង​អាយុ ៣៤ឆ្នាំនេះក៏ពិតមែន តែ​ខ្ញុំ​ចង់និយាយថា បេះដូងរបស់ខ្ញុំ នឹង​នៅ​ទីនេះ​រហូត"។

សូមបញ្ជាក់ថា Iniesta បាន​លេង​ឲ្យ​ក្រុម​ធំ Barcelona រយៈពេល ១៦ឆ្នាំ ប៉ុន្តែ​បើគិត​តាំង​ពី​ក្រុម​យុវជន​មក គឺ Iniesta បាន​រួមរស់ជាមួយ Barcelona ២២ឆ្នាំមកហើយ ពោល​គឺ​ចាប់​ពី​ឆ្នាំ​១៩៩៤ មក។ ពានធំៗ ដែល​កីឡាករ​រូបនេះ ឈ្នះនៅ Barca រួមមាន La Liga (៩ដង), Copa del Rey (៦ដង), Spanish Super Cup (៧ដង), UEFA Champions League (៤ដង), UEFA Super Cup (៣ដង) និង FIFA Club World Cup (៣ដង)៕