សម្ដេចហ៊ុន សែន លើកឡើងពីបញ្ហារបស់ ឆេង ម៉េង ក្នុងពានស្ដេចព្រុយណេ

2018-05-22 09:08:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេចនាយករដ្ឋមន្ត្រី ហ៊ុន សែន បានមានប្រសាសន៍ពាក់ព័ន្ធនឹងរឿងរបស់កីឡាករ ឆេង ម៉េង របស់ក្រុមជម្រើសជាតិក្រោមអាយុ២១ឆ្នាំកម្ពុជា ដែលទទួលការជេរស្ដី ឬការប្រើពាក្យមិនសមរម្យពីសំណាក់អ្នកលេងបណ្ដាញសង្គមហ្វេសប៊ុកនាពេលកន្លងទៅ។ សម្ដេច បានអំពាវនាវកុំឲ្យមានការជេរកីឡាករ ទោះបីជាពួកគេបានប្រព្រឹត្តកំហុសរហូតត្រូវបណ្ដេញចេញពីទីលាន ដូចជា ករណីរបស់ ឆេង ម៉េង ក៏ដោយ។

សម្ដេច ហ៊ុន សែន ថ្លែងនៅវិមានសន្តិភាព កាលពីពេលកន្លងទៅ

ការលើកឡើងនេះ ត្រូវធ្វើឡើងនៅរសៀលថ្ងៃទី២២ឧសភា ក្នុងជួបសំណេះសំណាល ក្រុមប្រតិភូ គ្រូបង្វឹក និងកីឡាករ-កីឡាការិនីកីឡាតេក្វាន់ដូ ITF កម្ពុជា ក៏ដូចជាប្រគល់ប្រាក់រង្វាន់របស់រាជរដ្ឋាភិបាល ដល់ម្ចាស់ជយលាភី ក្រោយបញ្ចប់បេសកកម្មក្នុងការប្រកួតកីឡាតេក្វាន់ដូ ITF ជ្រើសរើសជើងឯកអាស៊ី លើកទី៩ នៅទីក្រុង Ulaanbaatar ប្រទេសម៉ុងហ្គោលី។

សម្ដេចបានពន្យល់ថា មិនគួរឲ្យកើតមានរឿងបែបនេះចំពោះកីឡាករកម្ពុជាឡើយ។ លើសពីនេះ នាយករដ្ឋមន្ត្រីបានលើកទឹកចិត្តចំពោះកីឡាករកម្ពុជា ដែលខិតខំរហូតបានឈានដល់វគ្គផ្តាច់ព្រ័ត្រ ពានរង្វាន់ Hassanal Bolkiah Trophy 2018 ដែលត្រូវបានរៀបចំដោយសហព័ន្ធកីឡាបាល់ទាត់ព្រុយណេ កាលពីខែមេសា កន្លងទៅ។

ឆេង ម៉េង ទាត់បាល់ទៅបុកកីឡាករទីម័រដែលកំពុងដួល អំឡុងការប្រកួតវគ្គផ្ដាច់ព្រ័ត្រ ដែលកម្ពុជា ចាញ់ ទីម័រខាងកើត ដោយលទ្ធផល ០-១

សូមរំឭកថា ឆេង ម៉េង បានទទួលក្រហមក្នុងការប្រកួតវគ្គផ្ដាច់ព្រ័ត្រ ដែលកម្ពុជា ចាញ់ ទីម័រខាងកើត ដោយលទ្ធផល ០-១ ពានរង្វាន់ខាងលើ។ កីឡាករពាក់លេខ៣ រូបនេះ បានទាត់បាល់ទៅបុកកីឡាកររបស់ទីម័រដែលដួល ហើយបានបញ្ចេញកាយវិការមិនសមរម្យ នៅពេលប៉ះទង្គិចជាមួយអ្នកចាំទី និងកីឡាកររបស់ទីម័រដទៃទៀត៕

អត្ថបទ៖ លាភ.