វៀតណាម ត្រូវការ ៥ពាន់លានដុល្លារ ដើម្បីសាងសង់ និងពង្រីកព្រលានយន្តហោះធំៗ៣

2018-05-23 07:01:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម ត្រូវការលុយជាង ៥ពាន់លានដុល្លារ ដើម្បីសាងសង់ព្រលានយន្តហោះ Long Thanh និងពង្រីកព្រលានយន្តហោះ Noi Bai និង Tan Son Nhat ក្នុងអំឡុងឆ្នាំ ២០១៨-២០២១ ជាមួយនឹងទស្សនវិស័យដល់ឆ្នាំ២០២៥។ នេះបើយោងតាមផែនការវិនិយោគរបស់ក្រុមហ៊ុនសាជីវកម្មព្រលានយន្តហោះវៀតណាម (ACV)។

គម្រោងនេះ ធ្វើឡើងក្នុងខណៈដែលចំនួនអ្នកដំណើរឆ្លងកាត់ព្រលានយន្តហោះទាំង២២ នៅទូទាំងប្រទេសដែលគ្រប់គ្រង និងប្រតិបត្តិការដោយក្រុមហ៊ុន ACV ត្រូវបានរំពឹងថា នឹងកើនឡើង ១០% ក្នុង១ឆ្នាំៗពីឆ្នាំ២០១៨-២០២១។ ហើយចំនួននេះ នឹងអាចឈានដល់ជាង ១៣៧លាននាក់ត្រឹមឆ្នាំ២០២១ និងជាង ១៨៥លាននាក់នៅឆ្នាំ២០២៥។

ព្រលានយន្តហោះ Noi Bai (រូបថត៖ វិបសាយ Vietnam Online)

ក្នុងអំឡុងឆ្នាំ២០១៨-២០២១ ព្រលានយន្តហោះអន្តរជាតិ Noi Bai នៅក្រុងហាណូយ នឹងត្រូវពង្រីកស្ថានីយអ្នកដំណើរចំនួន២បន្ថែមទៀត ដើម្បីអាចទទួលភ្ញៀវដល់ ២៥លាននាក់ក្នុង១ឆ្នាំ និងពង្រីកកន្លែងចតយានយន្តផងដែរ។ ការពង្រីកនេះ នឹងធ្វើឱ្យស្ថានីយអ្នកដំណើរទាំងអស់របស់ព្រលានយន្តហោះនេះ អាចទទួលភ្ញៀវដល់ ៣០លាននាក់នៅឆ្នាំ២០២០ និង ៦០លាននាក់នៅឆ្នាំ២០៣០។ ការពង្រីកព្រលាននេះ គឺត្រូវការថវិកាប្រមាណ ៤៨៧លានដុល្លារ។

ចំណែកការពង្រីកព្រលានអន្តរជាតិយន្តហោះ Tan Son Nhat នៅក្រុងហូជីមិញ គឺត្រូវការថវិកាជាង ៥៤៨លានដុល្លារ។ ស្ថានីយអ្នកដំណើរនៃព្រលានយន្តហោះ នឹងត្រូវសាងសង់១បន្ថែមទៀត ដើម្បីទទួលភ្ញៀវ ១០លាននាក់ក្នុង១ឆ្នាំ រួមជាមួយនឹងការពង្រីកទីធ្លាចំណត ផ្លូវរត់របស់យន្តហោះ និងឧបករណ៍ជំនួយផ្សេងៗទៀត។ ព្រលានយន្តហោះនេះ ត្រូវបានរំពឹងថា នឹងអាចទទួលភ្ញៀវ ៤៥លាននាក់ក្នុង១ឆ្នាំ នៅឆ្នាំ២០២០។

ព្រលានយន្តហោះ Tan Son Nhat (រូបថត៖ វិបសាយ Journey Vietnam)

រីឯព្រលានយន្តហោះ Long Thanh នៅភាគខាងត្បូងខេត្តដុងណៃ នឹងត្រូវសាងសង់ក្នុងដំណាក់កាលទី១ នៅឆ្នាំ២០២៥ ជាមួយថវិកាប្រមាណ ៤ពាន់លានដុល្លារ។ ព្រលានយន្តហោះនេះ នឹងអាចទទួលភ្ញៀវ ២៥លាននាក់ និងទំនិញ ១,២លានតោន ក្នុង១ឆ្នាំ៕