អតីតនិពន្ធនាយកកាសែតភ្នំពេញប៉ុស្តិ៍ ទទួលបានតំណែងធំមួយ នៅកាសែត Khmer Times

2018-05-23 07:08:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីត្រូវបានបណ្តេញចេញតំណែងកាលពីដើមខែឧសភា លោក កៃ គឹមសុង អតីតនិពន្ធនាយកកាសែតភ្នំពេញប៉ុស្តិ៍ បានទទួលតំណែងថ្មី និងធំមួយ នៅកាសែតជាភាសាអង់គ្លេស Khmer Times។ នេះបើតាមការឱ្យដឹងពីលោក កៃ គឹមសុង នៅរសៀលថ្ងៃពុធ ទី ២៣ ឧសភានេះ។

លោក កៃ គឹមសុង ដែលមានតួនាទីជា ប្រធានប្រតិបត្តិ (COO) របស់កាសែត Khmer Times បានចូលកាន់តួនាទីហើយនៅថ្ងៃនេះ ។ អ្នកសារព័ត៌មានរូបនេះនិយាយថា កាសែត Khmer Times បានផ្តល់តួនាទីមកឱ្យលោក ដោយយល់ឃើញថាលោក មានសមត្ថភាពអាចបំពេញការងារនេះបានជោគជ័យ និងចំពេលដែលលោកទំនេរពីការងារ។

លោក កៃ គឹមសុង (ពាក់ក្រវាត់ ក) និង សហការី នៅកាសែត Khmer Times (រូបថតៈ ហ្វេសប៊ុក May Kunmakara)

ប៉ុន្តែរហូតមកទល់រសៀលនេះ លោក កៃ គឹមសុង នៅមិនទាន់ចុះកុងត្រា នៅលើកិច្ចសន្យាការងារជាផ្លូវការនៅឡើយទេ។

អត្ថបទពាក់ព័ន្ធ៖

និពន្ធនាយកកាសែតភ្នំពេញប៉ុស្តិ៍ ត្រូវបានបណ្តេញចេញពីតួនាទី បន្ទាប់ពីកាសែតនេះដូរម្ចាស់ថ្មី

ក្នុងតំណែងជា ប្រធានប្រតិបត្តិរបស់កាសែត Khmer Times លោក កៃ គឹមសុង នឹងមើលការខុសត្រូវ លើការិយាល័យនិពន្ធ (News room) និង ការរកប្រាក់ចំណូល (Sale) សម្រាប់កាសែត ព្រមទាំងរាយការណ៍ទៅកាន់ចាងហ្វាងការផ្សាយ (Publisher) ដែលជាជនជាតិម៉ាឡេស៊ី។

ទោះយ៉ាងណា អតីតនិពន្ធនាយកកាសែតភ្នំពេញប៉ុស្តិ៍រូបនេះ បន្ថែមថា កាសែត Khmer Times របស់លោក នឹងមិនក្លាយជាដៃគូប្រកួតប្រជែងជាមួយកាសែតភ្នំពេញប៉ុស្តិ៍នោះទេ៕

អត្ថបទ៖ ឃុត សុខឿន