២សប្ដាហ៍ ក្រសួងប្រកាសហាមឃាត់ផលិតផលបង្កើនតណ្ហា ៣ប្រភេទ

2018-05-23 07:57:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសុខាភិបាល បានប្រកាសឲ្យប្រជាពលរដ្ឋ មានការប្រុងប្រយ័ត្នខ្ពស់ចំពោះផលិតផលបង្កើនតណ្ហាបុរស ៣ប្រភេទ ដែលអាចបង្កការប៉ះពាល់ដល់សុខភាព និងអាយុជីវិតអ្នកប្រើប្រាស់។ សេចក្ដីប្រកាសរបស់ក្រសួងទាំង ៣ ដែលពាក់ព័ន្ធនឹងផលិតផលទាំងនេះ ត្រូវបានធ្វើឡើងក្នុងរយៈពេលត្រឹមតែ ២សប្ដាហ៍ប៉ុណ្ណោះ គិតពីថ្ងៃទី៩ឧសភាមក។

ផលិតផលទាំងនោះ សុទ្ធតែគ្មានក្រុមហ៊ុននាំចូលត្រឹមត្រូវ គ្មានចុះបញ្ជិកា គ្មានការត្រួតពិនិត្យ និងគ្មានការអនុញ្ញាតឲ្យផ្សព្វផ្សាយពីក្រសួង។

ផលិតផលទាំង៣ ប្រភេទរួមមាន៖

ផលិតផល “កាហ្វេចង្អុលមេឃ" ដែលមានផ្ទុកឱសថសម្រាប់បង្កើនតណ្ហាផ្លូវភេទបុរស ឈ្មោះ Sidenafil ។ Sidenafil នេះអាចបង្កគ្រោះថ្នាក់ដល់អាយុជីវិតរបស់អ្នកប្រើប្រាស់។

ថ្នាំបង្កើនតណ្ហាបុរស "King Man” ដែលផលិតនៅអាមេរិក ដោយអាចប៉ះពាល់ដល់សុខភាព ឬអាចឈានដល់បាត់បង់អាយុជីវិតអ្នកប្រើប្រាស់ ដោយសារគាំងបេះដូង។

ថ្នាំបង្កើនតណ្ហាបុរស "Male Extra” ដែលផលិតនៅអង់គ្លេស ដោយអាចប៉ះពាល់ដល់សុខភាព ឬអាចឈានដល់បាត់បង់អាយុជីវិតអ្នកប្រើប្រាស់ ដោយសារគាំងបេះដូង។

ក្រសួងសុខាភិបាល បានអំពាវនាវដល់ប្រជាពលរដ្ឋ ដែលជួបប្រទះជនណាដែលកំពុងប្រើប្រាស់ លក់ ចែកចាយ ផលិតផលខាងលើ ផ្ដល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង ដោយទាក់ទងតាមរយៈលេខទូរសព្ទ ០១១ ៥៧៤ ៧៨៧, ០៩៥ ៣៥៩ ៣៩៩, ០១២ ៩៨៣ ៣៣៤ និង ០១២ ៨៩២ ០២២ ៕

អត្ថបទ៖ លាភ.