UN សម្រេចដកទណ្ឌកម្មមួយ ចេញពីកូរ៉េខាងជើង មុនជំនួប គីមជុងអ៊ុន-ដូណាល់ត្រាំ

2018-05-23 23:08:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី២៣ឧសភា បានព្រមព្រៀងគ្នាក្នុងការលើកលែងទណ្ឌកម្មស្ដីពីការធ្វើដំណើរសម្រាប់កូរ៉េខាងជើង បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន គ្រោងជួបជាមួយលោកប្រធានាធិបតីអាមេរិក ដូណាល់ ត្រាំ នៅប្រទេសសិង្ហបុរី នាខែក្រោយ។ នេះបើតាមមន្ត្រីការទូតបានឲ្យដឹង។

ក្រុមប្រឹក្សាសន្តិសុខអង្គការសហប្រជាជាតិ សម្រេចលើកលែងទណ្ឌកម្មលើការធ្វើដំណើររបស់កូរ៉េខាងជើង កាលពីថ្ងៃទី២៣ឧសភា (រូបថត៖ Channel News Asia)

សិង្ហបុរី បានស្នើកាលពីសប្ដាហ៍មុន ឲ្យក្រុមប្រឹក្សាសន្តិសុខអង្គការសហប្រជាជាតិ អនុញ្ញាតឲ្យប្រតិភូកូរ៉េខាងជើងធ្វើដំណើរទៅចូលរួមកិច្ចប្រជុំកំពូល ដែលគ្រោងរៀបចំនៅថ្ងៃទី១២ ខែមិថុនា ឆ្នាំ២០១៨ និងចូលរួមកិច្ចប្រជុំដើម្បីត្រៀម។ នេះបើតាមការចុះផ្សាយរបស់ AFP ។

យ៉ាងណាក៏ដោយ មិនទាន់មានការបញ្ជាក់ពីចំនួនប្រតិភូកូរ៉េខាងជើងនៅឡើយទេ។

លោក គីម ជុងអ៊ុន

គួររំឭកថា អង្គការសហប្រជាជាតិ បានដាក់បុគ្គល និងអង្គភាពរបស់កូរ៉េខាងជើងប្រមាណជាង ៨០ ក្នុងបញ្ជីខ្មៅ ដោយមិនឲ្យធ្វើដំណើរទៅកាន់ប្រទេសនានា និងផ្អាកដំណើរការអង្គភាព។

កូរ៉េខាងជើង ក៏ត្រូវបានទទួលទណ្ឌកម្មលើការធ្វើពាណិជ្ជកម្ម ទំនិញ និងការដឹកជញ្ជូនប្រេងឥន្ធនៈ ទៅកាន់ទីក្រុងព្យុងយ៉ាង ក្រោយពីមានការធ្វើតេស្តសាកល្បងគ្រាប់មីស៊ីលរបស់កម្មវិធីនុយក្លេអ៊ែរកូរ៉េខាងជើងនាពេលកន្លងទៅ៕

ប្រភព៖ Channelnewsasia ប្រែសម្រួល៖ លាភ.