សមយុទ្ធដែនអាកាសអាមេរិក-កូរ៉េខាងត្បូង បិទបញ្ចប់មុនពេលកំណត់
- 2018-05-24 02:51:03
- ចំនួនមតិ 0 | ចំនួនចែករំលែក 0
សមយុទ្ធដែនអាកាសអាមេរិក-កូរ៉េខាងត្បូង បិទបញ្ចប់មុនពេលកំណត់
ចន្លោះមិនឃើញ
លំហាត់សមយុទ្ធដែនអាកាសរួមគ្នា Max Thunder រវាងកងទ័ពអាកាសអាមេរិក និងកូរ៉េខាងត្បូង នឹងត្រូវបិទបញ្ចប់នៅថ្ងៃទី២៤ ខែឧសភា ២០១៨នេះ។ នេះបើតាមការបញ្ជាក់មន្រ្តីយោធាកូរ៉េខាងត្បូង។
ការបិទបញ្ចប់សមយុទ្ធដែលមានរយៈពេល ២សប្ដាហ៍នេះ គឺធ្វើឡើងមួយថ្ងៃ មុនពេលកំណត់ ដែលគ្រោងបញ្ចប់នៅថ្ងៃទី២៥ ខែឧសភា ២០១៨ ស្អែកនេះ។ ការបិទបញ្ចប់សមយុទ្ធដែនអាកាសនេះ គឺក្រោយកូរ៉េខាងជើងបានលុបចោលជំនួបចរចាថ្នាក់រដ្ឋមន្ត្រីរវាងកូរ៉េខាងជើង និងកូរ៉េខាងត្បូង ដោយបានចាត់ទុកលំហាត់សមយុទ្ធនេះថា ជាការហាត់សមក្នុងការឈ្លានពាន។
សូមបញ្ជាក់ថា សមយុទ្ធដែនអាកាសរួមគ្នា Max Thunder បានចាប់ផ្ដើមពីថ្ងៃទី១១ ខែឧសភា ២០១៨ ដោយមានការចូលរួមពីយន្តហោះចម្បាំង ១០០គ្រឿង រួមមាន យន្តហោះចម្បាំង F-22 ចំនួន ៨គ្រឿងរបស់អាមេរិក យន្តហោះចម្បាំង F-15K និងយន្តហោះចម្បាំង F-16 ជាដើម។ ក្រោយបិទបញ្ចប់លំហាត់សមយុទ្ធនេះ យន្តហោះចម្បាំង F-22 របស់អាមេរិក ត្រូវរំពឹងថា នឹងហោះទៅកាន់មូលដ្ឋានកងទ័ពអាមេរិក នៅកោះហាវ៉ៃ វិញភ្លាមផងដែរ៕