ក្រុងវៀតណាមមួយ ផ្ដល់ថវិកាដល់រដ្ឋបាលខេត្តព្រះសីហនុ

2018-05-24 03:07:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ង្វៀន ថេគឿង អគ្គកុងស៊ុល នៃសាធារណរដ្ឋសង្គមនិយមវៀតណាមប្រចាំខេត្តព្រះសីហនុ បាននាំយកថវិកាចំនួន ជាង ១៣ម៉ឺនដុល្លារអាមេរិក (១៣១២៦៥ដុល្លារអាមេរិក) ប្រគល់ជូនលោក យន្ត មីន អភិបាលខេត្តព្រះសីហនុ កាលពីថ្ងៃទី២៣ ខែឧសភា ឆ្នាំ២០១៨។ នេះជាការចុះផ្សាយរបស់ទីភ្នាក់ងារសារព័ត៌មានកម្ពុជា។

ជំនួបរវាងលោក យន្ត មីន អភិបាលខេត្តព្រះសីហនុ និងលោក ង្វៀន ថេគឿង អគ្គកុងស៊ុល នៃសាធារណរដ្ឋសង្គមនិយមវៀតណាមប្រចាំខេត្តព្រះសីហនុ កាលពីថ្ងៃទី២៣ឧសភា ឆ្នាំ២០១៨ (រូបថត៖ រដ្ឋបាលខេត្តព្រះសីហនុ)

លោក ង្វៀន ថេគឿង មានប្រសាសន៍ថា ថវិកានេះជាកាដូរបស់ទីក្រុងហៃហ្វុង នៃសាធារណរដ្ឋសង្គមនិយមវៀតណាម ដែលផ្តល់ជូនក្នុងឱកាសខួប ៥០ឆ្នាំ ថ្វីត្បិតតែថវិកានេះផ្តល់មានការយឺតយ៉ាវបន្តិច ដោយសារការបំពេញបែបបទរដ្ឋបាល ។

លោកបន្តថា ការផ្តល់ថវិកានេះគឺដើម្បីរួមចំណែកជួយដល់ខេត្តព្រះសីហនុ យកមកធ្វើការអភិវឌ្ឍ ជំរុញសេដ្ឋកិច្ច ហើយសង្ឃឹមថា ខេត្តទាំងពីរនឹងបន្តកិច្ចសហការក្នុងការអភិវឌ្ឍកាន់តែលឿន ជំរុញឲ្យខេត្តព្រះសីហនុ ក្លាយជាមជ្ឈមណ្ឌលពាណិជ្ជកម្ម ដែលមានអ្នកវិនិយោគវៀតណាមមកធ្វើការវិនិយោគកាន់តែច្រើន ។ លោកឲ្យដឹងផងដែរថា ក្រុមហ៊ុនវិនិយោគផលិតដែកថែប និងក្រុមហ៊ុនសាងសង់ នៃវៀតណាម មានគម្រោងមកសិក្សា និងធ្វើការវិនិយោគនៅខេត្តព្រះសីហនុ។

ចំពោះថវិកាជាង ១៣ម៉ឺនដុល្លារខាងលើ នឹងត្រូវរដ្ឋបាលខេត្តព្រះសីហនុប្រើប្រាស់ក្នុងការសាងសង់ផ្លូវបេតុង ១ខ្សែ នៅស្រុកស្ទឹងហាវ ដែលមានប្រវែង ១២០០ម៉ែត្រ ទទឹង ៦ម៉ែត្រ ឆ្លងកាត់ឃុំចំនួន២ គឺឃុំអូរត្រេះ និងឃុំកំពេញ ក្នុងចំណោមឃុំ៤ នៃស្រុកស្ទឹងហាវ៕

អត្ថបទ៖ លាភ.