រូបចម្លាក់ព្រះពុទ្ធបដិមានៅលើភ្នំសំពៅ ត្រូវផ្អាកសាងសង់ ក្រោយរកឃើញបញ្ហាធំ២

2018-05-24 04:21:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រូបចម្លាក់ព្រះសិរនៃព្រះពុទ្ធបដិមានៅលើជញ្ជាំងភ្នំសំពៅ ត្រូវបានផ្អាកការសាងសង់ជាបណ្តោះអាសន្ន ក្រោយមន្រ្តីជំនាញ បានពិនិត្យឃើញថា ថ្មភ្នំផុយស្រួយ និងរូបសំណាកមានស្នាមប្រេះ។

លោក គុណ សម្បត្តិមុន្នីរ័ត្ន ប្រធានមន្ទីរធម្មការ និងសាសនា ខេត្តបាត់ដំបង បានប្រាប់ឱ្យដឹងថា ក្រុមការងារជំនាញបានចុះពិនិត្យដល់ទីតាំងដែលសមាគមស្នើសុំសាងសង់រូបចម្លាក់ព្រះសិររបស់ព្រះពុទ្ធរូបឡើងវិញ បន្ទាប់ពីមជ្ឍមណ្ឌល បណ្តុះបណ្តាលវិជ្ជាជីវ:សិល្បៈសូន្យរូប មរតកអង្គរ ផុតកិច្ចសន្យា និងបោះបង់គម្រោងស្ថាបនា សំណាកព្រះពុទ្ធរូបនេះយូរឆ្នាំ។

ជញ្ជាំងភ្នំសំពៅ ត្រង់ទីតាំងសាងសង់រូបចម្លាក់ព្រះពុទ្ធ (រូបថត៖ រស្មីកម្ពុជា)

លោកបន្តថា ឆ្លងតាមការចុះត្រួតពិនិត្យ ក្រុមជំនាញបានឃើញថា ទីតាំងចម្លាក់ព្រះពុទ្ធរូបនេះ មិនអាចបន្តការសាងសង់ទៀតបានឡើយ ដោយសារថ្មភ្នំត្រង់កន្លែងឆ្លាក់ ជាប្រភេទថ្មកំបោរ ហើយជាក់ស្តែង រូបសំណាកដែលសាងសង់បានត្រឹមកំណាត់ព្រះសិរនៃព្រះពុទ្ធបដិមានេះ មានស្នាមប្រេះ មិនអាចទ្រទ្រង់ទម្ងន់តួព្រះពុទ្ធបដិមាទាំងមូលបានទេ។

លោកប្រធានមន្ទីរ បានបន្ថែមថា គម្រោងសាងសង់ព្រះពុទ្ធរូបនេះ មាន ៣ប្លង់ រួមមានប្លង់ ព្រះពុទ្ធប្រសូត្រ ត្រាស់ដឹង និងប្លង់ព្រះពុទ្ធចូលបរិនិព្វាន ដែលមានកម្ពស់ពីដីប្រមាណជាង ៣០ម៉ែត្រ។ គម្រោងនេះ បានចាប់ផ្តើម នៅឆ្នាំ២០០៦ ប៉ុន្តែដំណើរការសាងសង់ បានត្រឹមរយៈពេលខ្លីប៉ុណ្ណោះ ក៍៏ត្រូវផុតកិច្ចសន្យានិងបានបោះបង់គម្រោងចោលឱ្យនៅទ្រឹងតែម្តង។ ទើបតែបច្ចុប្បន្ននេះ សមាគមបានចាប់ដៃគូ រៀបចំសំណើសាងសង់ឡើងវិញ។ ការធ្វើសំណើជាថ្មីនេះ គណៈកម្មការវាយតម្លៃថ្នាក់ខេត្ត មិនទាន់កំណត់ថាយ៉ាងណានោះទេ ហើយនឹងត្រូវសម្រេចនាពេលក្រោយ។

ការសាងសង់ព្រះពុទ្ធបដិមាដ៏ធំនៅលើជញ្ជាំងរមណីយដ្ឋានធម្មជាតិភ្នំសំពៅនេះ គឺក្នុងគោលបំណងផ្សព្វផ្សាយ ពង្រីកវិស័យព្រះពុទ្ធសាសនាផង និងដើម្បីទាក់ទាញភ្ញៀវជាតិ និងភ្ញៀវអន្តរជាតិ ឱ្យចូលមកទស្សនាក្នុងខេត្តបាត់ដំបង កាន់ច្រើនថែមទៀត៕

ប្រភព៖ រស្មីកម្ពុជា ប្រែសម្រួល៖ សំភី