កម្ពុជា នឹងរៀបចំកម្មវិធី៤ ក្នុងពេលធ្វើជាប្រទេសកិត្តិយស នៃពិព័រណ៌ពាណិជ្ជកម្មចិន-អាស៊ាន

2018-05-24 06:22:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងនាមជាប្រទេសកិត្តិយសនៃពិព័រណ៌ពាណិជ្ជកម្ម ចិន-អាស៊ានលើកទី១៥ នាពេលខាងមុខនេះ កម្ពុជានឹងរៀបចំនូវកម្មវិធីចំនួន៤ ដូចជា៖

ទី១-ពន្លាជាតិកម្ពុជា និងការតាំងបង្ហាញផលិតផលខ្មែរ

ទី២-ដំណើរទស្សនកិច្ចនៅតាមក្រុមហ៊ុន សហគ្រាស និងចូលរួមវេទិកាធុរកិច្ច និងវិនិយោគផ្សេងៗនៅក្នុងប្រទេសចិន

ទី៣-វេទិកាស្តីពីពាណិជ្ជកម្ម និងវិនិយោគកម្ពុជា-ចិន លើកទី៣

និងទី៤-វេទិកាធុរកិច្ច និងវិនិយោគ ពិធីចុះហត្ថលេខាលើអនុស្សារណៈយោគយល់គ្នា “MOU” និងកម្មវិធីជំនួបពាណិជ្ជកម្ម។

មជ្ឈមណ្ឌលសន្និសីទ និងពិព័រណ៍អន្តរជាតិ ទីក្រុងណាននីង ដែលជាកន្លែងរៀបចំពិព័រណ៍ពាណិជ្ជកម្មចិន-អាស៊ាន លើកទី១១ កាលពីឆ្នាំ២០១៤។ រូបថត៖ NEWS.CN

គួរបញ្ជាក់ថា ពិព័រណ៍ពាណិជ្ជកម្មចិន-អាស៊ាន លើកទី១៥ នឹងត្រូវប្រព្រឹត្តទៅចាប់ពីថ្ងៃទី១២ ដល់ ១៥ ខែកញ្ញា ឆ្នាំ២០១៨ នៅមជ្ឈមណ្ឌលសន្និសីទ និងពិព័រណ៍អន្តរជាតិ ទីក្រុងណាននីង ខេត្តក្វាងស៊ី ប្រទេសចិន។ នេះបើយោងតាមលិខិតជូនដំណឹងរបស់ក្រសួងពាណិជ្ជកម្ម កាលពីថ្ងៃទី២៦ ខែមេសា ឆ្នាំ២០១៨ និងទើបតែត្រូវបានចេញផ្សាយជាផ្លូវការកាលពីថ្ងៃទី២៣ ខែឧសភា ឆ្នាំ២០១៨។

ក្រសួងពាណិជ្ជកម្ម បានអញ្ជើញពាណិជ្ជករ និងអាជីវករទាំងអស់ ដែលមានបំណងទៅចូលរួមពិព័រណ៍នេះ ឬមានគម្រោងស្វែងរកដៃគូវិនិយោគ ឬត្រូវចុះ MOU ជាមួយដៃគូខ្លួន ឱ្យប្រញាប់រួសរាន់ មកបំពេញបែបបទ និងផ្ញើគម្រោងរបស់ខ្លួន ទៅនាយកដ្ឋានកិច្ចការពិព័រណ៍ នៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម ឱ្យបានមុនថ្ងៃទី៥ ខែសីហា ឆ្នាំ២០១៨៕

អត្ថបទ៖ សំភី