ក្រោយ៥២ឆ្នាំ រឿងរ៉ាវពាន World Cup មួយដែលត្រូវគេលួច ត្រូវបានលាតត្រដាង

2018-05-24 06:51:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាថ៌កំបាំងពានរង្វាន់ World Cup មួយ ដែលពេលនោះត្រូវគេស្គាល់ថា ពានរង្វាន់ Jules Rimet World Cup ត្រូវបានបង្ហាញ បន្ទាប់ពីត្រូវចោរលួចជាង ៥ទសវត្សរ៍កន្លងទៅ។ តាមការពិត ករណីនេះត្រូវបានរៀបចំឡើងដោយបងប្អូនជនជាតិអង់គ្លេសចំនួន ២នាក់។

ពានរង្វាន់ World Cup មុនឆ្នាំ១៩៦៦ (រូបថត៖ PA Images)

បើតាមលោក Gary កូនប្រុសរបស់ជនសង្ស័យម្នាក់ បានប្រាប់សារព័ត៌មាន Mirror កាលពីពេលថ្មីៗនេះថា ជនសង្ស័យមានគ្នាពីរនាក់ ក្នុងម្នាក់ឈ្មោះ Sidney Cugullere បានលួចពានរង្វាន់ World Cup ខាងលើកាលពី៥២ឆ្នាំមុន។ គ្រានោះ ជនសង្ស័យមានវ័យ៤០ឆ្នាំ បានផ្សំគំនិតជាមួយឪពុករបស់គេឈ្មោះ Reg។

ជនសង្ស័យ Sidney Cugullere និង Reg (ស្ដាំ) (រូបថត៖ Phil Harris)

កូនប្រុសរបស់ជនសង្ស័យដដែលបន្តថា ឪពុករបស់គាត់ធ្វើដូច្នេះដោយគ្រាន់តែជាការលេងសើចប៉ុណ្ណោះ។ យ៉ាងណាក៏ដោយ ឪពុករបស់គាត់ ដែលត្រូវបានជាប់ពន្ធនាគារ ២៥ឆ្នាំដោយករណីផ្សេងៗទៀត បានស្លាប់កាលពីឆ្នាំ២០០៥ ក្នុងវ័យ៧៩ឆ្នាំ ដោយសារជំងឺមហារីក។

លោក Gary (រូបថត៖ Phil Harris)

ក្រុមជនសង្ស័យដែលបានស្លាប់ មិនដែលត្រូវបានប៉ូលិសចាប់ខ្លួនមកទទួលទោសចំពោះទង្វើរបស់ពួកគេឡើយ។

សូមជម្រាបថា ការលួចពានរង្វាន់ World Cup នេះបានកើតឡើងក្នុងពិធីតាំងបង្ហាញមួយ នៅសាលមហោស្រព Methodist Central នៅក្រុង Westminster ប្រទេសអង់គ្លេស នៅថ្ងៃអាទិត្យ ទី២០ ខែមីនា ឆ្នាំ១៩៦៦។ ពេលនោះ សហព័ន្ធបាល់ទាត់អង់គ្លេស បានយកពានរង្វាន់ខាងលើ មកតាំងបង្ហាញត្រឹមតែ ២៤ម៉ោងប៉ុណ្ណោះ។

ដោយសារតែពិបាកក្នុងការលក់ ជនសង្ស័យបានសុខចិត្តបោះបង់ចោលពានរង្វាន់ដែលពួកខ្លួនលួច នៅទីតាំងមួយ ហើយ១សប្ដាហ៍ក្រោយមកត្រូវបានសុនខមួយក្បាលរកឃើញ ក្នុងខែមីនា ឆ្នាំ១៩៦៦។ សុនខនោះឈ្មោះ Pickles ដែលត្រូវបានគេកត់ត្រាឈ្មោះរបស់វាក្នុងប្រវត្តិសាស្ត្រផងដែរ។

សុនខដែលមានឈ្មោះថា Pickles (រូបថត៖ Wikipedia)

គួរដឹងផងដែរថា ជនសង្ស័យ Sidney គឺជាជនជាតិអង់គ្លេសទីមួយដែលបានកាន់ពានរង្វាន់ World Cup មុនគេបង្អស់។ ក្រោយមក ក្រុមជម្រើសជាតិអង់គ្លេស ដែលជាម្ចាស់ផ្ទះ ក៏បានឈ្នះពានរង្វាន់ World Cup ក្នុងឆ្នាំ១៩៦៦ ដោយបំបាក់ក្រុមអាល្លឺម៉ង់ខាងលិច ដោយលទ្ធផល ៤-១ នៅវគ្គផ្តាច់ព្រ័ត្រ ។ គ្រានោះ លោក Bobby Moore គឺជាកីឡាករអង់គ្លេសដំបូងគេ ដែលបានលើកពានរង្វាន់នេះ។

ពានរង្វាន់ Jules Rimet World Cup ត្រូវបានប្រើប្រាស់ពីឆ្នាំ១៩៣០ ដល់ ១៩៧០។ ហើយពានរង្វាន់ World Cup ត្រូវបានរចនារូបរាងថ្មី សម្រាប់ព្រឹត្តិការណ៍ FIFA World Cup កាលពីឆ្នាំ១៩៧៤៕

អត្ថបទទាក់ទង ធ្លាប់ដឹងឬអត់ ប្រទេសមួយនៅអាស៊ាន ធ្លាប់ឡើងទៅលេង World Cup?

ប្រភព៖ Dailymail ប្រែសម្រួល៖ លាភ.