អង្គរវត្ត ជាប់លេខ១ជាសំណង់ប្រវត្តិសាស្ត្រដ៏អស្ចារ្យបំផុតលើលោក ២ឆ្នាំជាប់ៗគ្នា

2018-05-24 08:28:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ដែលជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតនិងចំណាត់ថ្នាក់លេខ១៣ជាគោលដៅទេសចរណ៍របស់ពិភពលោកសម្រាប់ឆ្នាំ២០១៨នេះ។ កាលពីឆ្នាំ២០១៧ អង្គរវត្ត ក៏ទទួលបានចំណាត់ថ្នាក់លេខ១នេះពី TripAdvisor ផងដែរ។

TripAdvisor បានចុះផ្សាយកាលពីថ្ងៃទី២៣ឧសភា ឆ្នាំ២០១៨ថា ចំណាត់ថ្នាក់លេខ២ សំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតក្នុងតំបន់អាស៊ី បានទៅលើព្រះវិហារ Taj Mahal របស់ឥណ្ឌា និងលេខ៣ បានទៅលើប្រាសាទវត្តភូ (Wat Pho) របស់ថៃ។

ភ្ញៀវទេសចរកំពុងផ្តិតយកទិដ្ឋភាពថ្ងៃរះ នៅមុខប្រាសាទអង្គរវត្ត កាលពីខែមីនា ឆ្នាំ២០១៨

នេះគឺជាឆ្នាំទី៥ហើយ ដែលអង្គរត្រូវបានភ្ញៀវទេសចរលើពិភពលោកបោះឆ្នោតគាំទ្រ ហើយទទួលបានចំណាត់លេខ១ជាប់ៗគ្នាតាមរយៈគេហទំព័រដ៏ល្បីល្បាញផ្សេងៗគ្នា។

កាលពីឆ្នាំ២០១៤ អង្គរបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្រ្តទាំងអស់លើពិភពលោកមកប្រៀបធៀបគ្នា នោះគឺគេហទំព័រ ArchaeoMadness។

បន្ទាប់មកទៀត នៅដើមឆ្នាំ២០១៥ អង្គរទទួលបានចំណាត់ថ្នាក់លេខ១ម្តងទៀត នៅលើគេហទំព័រអន្តរជាតិមួយ ដែលជាគេហទំព័រផ្សព្វផ្សាយតំបន់ទេសចរណ៍ល្បីៗលើពិភពលោក នោះគឺគេហទំព័រ TripAdvisor។

នៅឆ្នាំ២០១៦ អង្គរបានបន្តជាប់លេខ១ទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវេបសាយ ទស្សនាវដ្ដី និងសៀវភៅ ជាដើម។

ទេសចរ កំពុងដើរនៅជ្រុងម្ខាងនៃប្រាសាទអង្គរវត្ត

សូមបញ្ជាក់ថា ក្នុងរយៈពេល ៤ខែដើមឆ្នាំ២០១៨ ភ្ញៀវទេសចរបរទេសទិញប័ណ្ណចូលទស្សនារមណីយដ្ឋានអង្គរ មានជាង ១លាននាក់ និងរកចំណូលបានជាង ៤៨លានដុល្លារអាមេរិក។ នេះបើតាមរបាយការណ៍គ្រឹះស្ថានអង្គរ ដែលចេញផ្សាយកាលពីដើមខែឧសភានេះ៕

អត្ថបទ៖ លាភ.