Salah ប្រាប់ពីកត្តាដែលអាចជួយ Liverpool ឈ្នះ Real វគ្គផ្តាច់ព្រ័ត្រ UCL យប់នេះ

2018-05-26 03:12:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាបាល់ទាត់ឆ្នើម Mohamed Salah របស់ក្លឹប Liverpool បាននិយាយថា ភាពមិនអាត្មានិយមគឺជារឿងដ៏សំខាន់ក្នុងការប្រកួតជាមួយក្លឹបយក្ស Real Madrid ក្នុងការប្រកួតវគ្គផ្តាច់ព្រ័ត្រ ពានរង្វាន់ UEFA Champions League នៅយប់នេះ។

Mane និង Salah អបអរក្រោយការរកគ្រាប់បាល់ឲ្យ Liverpool នាពេលកន្លងទៅ (រូបថត៖ Mondedufoot)

Salah ដែលបានក្លាយជាកីឡាករឆ្នើមប្រចាំរដូវកាល នៅលីគកំពូលអង់គ្លេសបាននិយាយប្រាប់វេបសាយ UEFA ថា វាមិនសំខាន់ថានរណាជាអ្នកស៊ុតចូលនោះទេ។ ទោះបីជា Roberto Firmino ឬក័ Sadio Mane ជាអ្នករកគ្រាប់បាល់ឲ្យ Liverpool ក្ដី ក៏គេមានការសប្បាយរីករាយដែរ។

«វាមិនសំខាន់ថា នរណាជាអ្នកស៊ុតចូលនោះទេ... សំខាន់ត្រូវស្វែងរកជ័យជម្នះ ទទួលបានពិន្ទុ នោះជារឿងសំខាន់សម្រាប់ពួកយើង ព្រោះអ្នកទាំងអស់គ្នាបានឃើញហើយថា ខ្ញុំរកបាន ១០គ្រាប់ នៅ Champions League, Sadio Mane រកបាន ៩គ្រាប់ ចំណែក Firmino រកបាន ១០គ្រាប់។ ដូច្នេះនរណាជាអ្នករកគ្រាប់បាល់ក៏ដូចគ្នាដែរ»។ នេះជាសម្ដីរបស់ Salah ។

Salah ក្នុងការប្រកួតនាពេលកន្លងទៅ (រូបថត៖ ARYSports.tv)

កីឡាករសញ្ជាតិអេហ្ស៊ីបនេះ រកបាន ៤៤គ្រាប់ ក្នុងចំណោម ៩០គ្រាប់នៅលីគកំពូលអង់គ្លេស រដូវកាល ២០១៧-១៨ ដែលទើបតែបញ្ចប់កាលពីពេលថ្មីៗនេះ។

សូមបញ្ជាក់ថា ការប្រកួតវគ្គផ្តាច់ព្រ័ត្រ UCL យប់នេះ ធ្វើឡើងវេលាម៉ោង ១:៤៥ នាទី (ម៉ោងនៅកម្ពុជា) ឈានចូលថ្ងៃទី២៧ ខែឧសភា ឆ្នាំ២០១៨។ បើ Liverpool ឈ្នះ នោះពួកគេនឹងក្លាយជាជើងឯកពានរង្វាន់លំដាប់កំពូលទ្វីបអឺរ៉ុបនេះជាលើកទី៦ ខណៈ Real Madrid ក៏កំពុងស្វែងរកតំណែងជើងឯកពានរង្វាន់នេះ ជាលើកទី១៣ផងដែរ៕

ប្រភព៖ Channelnewsasia ប្រែសម្រួល៖ លាភ.