ព្រឹត្តិការណ៍នយោបាយជាតិ-អន្តរជាតិសំខាន់ៗប្រចាំសប្តាហ៍
- 2018-05-27 10:15:34
- ចំនួនមតិ 0 | ចំនួនចែករំលែក 0
ព្រឹត្តិការណ៍នយោបាយជាតិ-អន្តរជាតិសំខាន់ៗប្រចាំសប្តាហ៍
ចន្លោះមិនឃើញ
ខ្លីៗ សូមលើកយកនូវព្រឹត្តិការណ៍ជាតិ និងអន្តរជាតិសំខាន់ៗ ដែលបានកើតឡើងក្នុង១សប្តាហ៍នេះ មកបង្ហាញជូនដូចខាងក្រោម៖
ព្រឹត្តិការណ៍នយោបាយជាតិ
១. គ.ជ.ប ទទួលស្គាល់ចុះបញ្ជីគណបក្សទាំង២០ ជាផ្លូវការ
គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចទទួលស្គាល់ចុះបញ្ជីគណបក្សនយោបាយទាំង២០ ជាផ្លូវការ។ ក្នុងនោះ គណបក្សរស្មីខេមរា និងគណបក្សជនជាតិដើមប្រជាធិបតេយ្យ ត្រូវបាន គ.ជ.ប ទទួលស្គាល់ចុងក្រោយគេកាលពីថ្ងៃទី២៣ ខែឧសភា ឆ្នាំ២០១៨ បន្ទាប់ពីគណបក្សទាំង២ បានបំពេញឯកសារគ្រប់លក្ខខណ្ឌសម្រាប់ការចុះបញ្ជីគណបក្សនយោបាយឈ្មោះបោះឆ្នោត និងបញ្ជីបេក្ខជនឈរឈ្មោះ។
គ.ជ.ប ក៏បានប្រកាសថា នឹងរៀបចំពិធីចាប់ឆ្នោតកំណត់លេខរៀងគណបក្សនយោបាយនៅលើសន្លឹកឆ្នោត ដោយសម្តេចព្រះសង្ឃរាជទាំងពីរគណៈ នៅសាលប្រជុំអគារ S នៃក្រសួងមហាផ្ទៃ នៅថ្ងៃទី២៩ ខែឧសភា ខាងមុខនេះ។
២. សម្តេច ហ៊ុន សែន ព្រមានដករដ្ឋមន្រ្តី ក្នុងរឿងពុលនៅខេត្តក្រចេះ
ក្នុងកិច្ចប្រជុំគណៈរដ្ឋមន្រ្តី កាលពីថ្ងៃទី២៥ ខែឧសភា ឆ្នាំ២០១៨ សម្តេច ហ៊ុន សែន បានព្រមានដករដ្ឋមន្ត្រីណាដែលរំលោភបំពានអំណាច និងមិនគោរពឋានានុក្រម និងកុំឲ្យមានការសាចទឹកដាក់គ្នានៅក្នុងរដ្ឋាភិបាល ពាក់ព័ន្ធនឹងករណីពុលស្លាប់ នៅខេត្តក្រចេះ កាលពីដើមខែឧសភា។
ទាក់ទងករណីពុលស្លាប់នៅខេត្តក្រចេះ សម្តេចនាយករដ្ឋមន្ត្រី ហ៊ុន សែន បានឲ្យយករបាយការណ៍របស់ក្រសួងសុខាភិបាលដែលបានចេញកន្លងមកនេះ គឺជារបាយការណ៍ផ្លូវការ គ្មានអ្នកណាមួយដែលអាចបដិសេធនោះទេ។
ព្រឹត្តិការណ៍នយោបាយអន្តរជាតិ
១. អ៊ីស្រាអែលក្លាយជាប្រទេសដំបូងគេ ដែលវាយប្រហារពីដែនអាកាសដោយប្រើយន្តហោះចម្បាំង F-35
អ៊ីស្រាអែលបានក្លាយជាប្រទេសដំបូងគេ ក្នុងពិភពលោក ដែលបានបើកការវាយពីដែនអាកាសដោយប្រើយន្តហោះចម្បាំងដ៏ទំនើបចុងក្រោយរបស់អាមេរិក F-35។ នេះបើតាមការបញ្ជាក់របស់មេបញ្ជាការកងទ័ពអ៊ីស្រាអ៊ែល ក្នុងសន្និសីទមួយនៅក្រុង Herzilya កាលពីថ្ងៃទី២២ ខែឧសភា ឆ្នាំ២០១៨។
យន្តហោះចម្បាំង F-35 ត្រូវបានប្រើប្រាស់នៅតំបន់មជ្ឈិមបូព៌ា និងបានវាយប្រហារ ២លើកមកហើយ លើទីតាំង ២ផ្សេងគ្នា។ លោកបានបញ្ជាក់ទៀតថា ក្រោយការវាយប្រហារពីយន្តហោះចម្បាំង F-35 មានមីស៊ីលជាង ១០០គ្រាប់ ត្រូវបានបាញ់សំដៅមកយន្តហោះចម្បាំង F-35 ប៉ុន្ដែពុំបានធ្វើឲ្យខូចខាតដល់យន្តហោះចម្បាំងរបស់អ៊ីស្រាអែលនោះទេ។
២. UN សម្រេចដកទណ្ឌកម្មការធ្វើដំណើរសម្រាប់កូរ៉េខាងជើង មុនជំនួប គីម ជុងអ៊ុន-ដូណាល់ ត្រាំ
កាលពីថ្ងៃទី២៣ ខែឧសភា ឆ្នាំ២០១៨ ក្រុមប្រឹក្សាសន្តិសុខអង្គការសហប្រជាជាតិ បានព្រមព្រៀងគ្នាក្នុងការលើកលែងទណ្ឌកម្មស្ដីពីការធ្វើដំណើរសម្រាប់កូរ៉េខាងជើង បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន គ្រោងជួបជាមួយលោកប្រធានាធិបតីអាមេរិក ដូណាល់ ត្រាំ នៅប្រទេសសិង្ហបុរី នាខែក្រោយ។
គួររំឭកថា អង្គការសហប្រជាជាតិ បានដាក់បុគ្គល និងអង្គភាពរបស់កូរ៉េខាងជើងប្រមាណជាង ៨០ ក្នុងបញ្ជីខ្មៅ ដោយមិនឲ្យធ្វើដំណើរទៅកាន់ប្រទេសនានា និងផ្អាកដំណើរការអង្គភាព។
៣. លោក ដូណាល់ ត្រាំ នឹងជួបលោក គីម ជុងអ៊ុន នៅថ្ងៃទី១២ ខែមិថុនា
ប្រធានាធិបតីអាមេរិក លោក ដូណាល់ ត្រាំ បានប្រកាសនៅសេតវិមាននាថ្ងៃទី២៧ ខែឧសភា ឆ្នាំ២០១៨នេះថា លោកនឹងជួបប្រជុំជាមួយមេដឹកនាំកូរ៉េខាងជើង លោក គីម ជុងអ៊ុន នាថ្ងៃទី១២ ខែមិថុនា ឆ្នាំ២០១៨ នៅប្រទេសសិង្ហបុរី តាមការកំណត់ដូចលើកមុន។ ការប្រកាសនេះ ធ្វើឡើងក្រោយពេលដែលកូរ៉េខាងជើង នៅតែបង្ហាញឆន្ទៈក្នុងការចរចាជាមួយអាមេរិក បើទោះបីជាលោក ដូណាល់ ត្រាំ បានប្រកាសលុបចោលជំនួបកំពូលនេះ កាលពីថ្ងៃព្រហស្បតិ៍កន្លងទៅក៏ដោយ។