ក្រុមហ៊ុនខ្នាតយក្ស៤របស់ចិន កំពុងក្តោបក្តាប់ការវិនិយោគអចលនទ្រព្យនៅកម្ពុជា

2018-05-30 00:58:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនរបស់ចិនធំៗចំនួន៤ កំពុងមានសកម្មភាពផុសផុលខ្លាំងជាងគេ ក្នុងចំណោមក្រុមហ៊ុនចិនផ្សេងៗទៀតដែលវិនិយោគលើវិស័យសំណង់ និងអចលនទ្រព្យនៅកម្ពុជា។ នេះបើតាមការអះអាងរបស់លោក James Hodge នាយករងក្រុមហ៊ុន CBRE Cambodia ថ្លែងប្រាប់សារព័ត៌មាន Reuters កាលពីចុងសប្តាហ៍មុនកន្លងទៅនេះ។

លោក James Hodge បានបញ្ជាក់ថា ក្រុមហ៊ុនចិនធំៗដែលកំពុងសកម្មភាពលេចធ្លោជាងគេទាំងនោះមានដូចជា ក្រុមហ៊ុន Guangzhou Yeutai Group, Prince Real Estate, Jiayuan International Group និងក្រុមហ៊ុន Guangzhou R&F Properties។

សំណង់អគាររបស់ក្រុមហ៊ុនចិន នៅក្នុងរាជធានីភ្នំពេញ

- ក្រុមហ៊ុន Guangzhou Yeutai Group ជាក្រុមហ៊ុនវិនិយោគលើវិស័យឧស្សាហកម្មអចលនទ្រព្យ ដ៏វ័យចំណាស់មួយរបស់ប្រទេសចិន ត្រូវបានបង្កើតឡើងក្នុងឆ្នាំ១៩៩៤ ដែលភាគច្រើនការវិនិយោគរបស់ក្រុមហ៊ុននេះ ផ្តោតលើការសាងសង់លំនៅឋាន និងអគារពាណិជ្ជកម្ម។ ក្រុមហ៊ុន East Development (HK) Ltd ដែលជាបុត្រសម្ព័ន្ធរបស់ក្រុមហ៊ុន Guangzhou Yeutai Group បានឈានជើងចូលទីផ្សារកម្ពុជា ក្នុងអំឡុងពាក់កណ្តាលឆ្នាំ២០១៥ ដោយបោះទុនវិនិយោគលើគម្រោង៣ ក្នុងតម្លៃ៦០លានដុល្លារ។ គម្រោងទាំងបីនោះមានដូចជា East One International Apartment, East View Residences និងគម្រោងមជ្ឈមណ្ឌលពាណិជ្ជកម្ម East Commercial Centre។

ក្រុមហ៊ុន Prince Real Estate បាននឹងកំពុងវិនិយោគលើលំនៅឋានខុនដូ និងអគារការិយាល័យ ជាដើម។ ក្នុងនោះមានគម្រោង The Prince Central Plaza, Prince Modern Plaza និងគម្រោង Prince Times Plaza ដែលស្ថិតនៅតាមបណ្តោយមហាវិថីនរោត្តម ក្បែរទីក្រុងរណបកោះពេជ្រ។ ក្រៅពីនេះ ក្រុមហ៊ុនចិនមួយនេះក៏បានទិញយកអគារក្នុងមជ្ឈមណ្ឌលកោះពេជ្រមួយចំនួនផងដែរដូចជា អគារ Diamond One និងអគារ Diamond International ហើយក៏មានគម្រោងវិនិយោគមួយចំនួនទៀតផងដែរ ក្នុងខេត្តព្រះសីហនុ។

គម្រោងអគារ Prince Times Plaza

ក្រុមហ៊ុន Jiayuan International Group បានទិញដី ៥កន្លែងក្នុងតម្លៃ ៣៥,៦លានដុល្លារអាមេរិក កាលពីពាក់កណ្តាលខែឧសភាកន្លងទៅនេះ ស្ថិតតាមបណ្តោយផ្លូវជាតិលេខ៦ ក្នុងខណ្ឌជ្រោយ ចង្វារសម្រាប់ការវិនិយោគលំនៅឋាន និងអគារពាណិជ្ជកម្ម។
ក្រុមហ៊ុន Guangzhou R&F Properties បានបង្ហើបពីគម្រោងវិនិយោគសណ្ឋាគារផ្កាយ៦ នៅភ្នំពេញ និងនៅខេត្តព្រះសីហនុ ដែលមានតម្លៃ ៣ពាន់លានដុល្លារអាមរិក កាលពីដើមឆ្នាំ២០១៧ ក្នុងជំនួបជាមួយរវាងសម្តេច ហ៊ុន សែន និងលោក Zhang Li អគ្គនាយកក្រុមហ៊ុន Guangzhou R&F Properties។ ហើយនៅក្នុងខែធ្នូ ឆ្នាំ២០១៧កន្លងទៅ ក្រុមហ៊ុននេះបានបើកការដ្ឋានសាងសង់មជ្ឈមណ្ឌលពាណិជ្ជកម្មពហុបំណងមួយ មានតម្លៃរហូតដល់ ៧០០លានដុល្លារអាមេរិក ដែលរួម មានទាំងអគារខុនដូ អាផាតមិន និងកន្លែងកម្សាន្តជាដើម ស្ថិតនៅតាមបណ្តោយផ្លូវ ៦០ម៉ែត្រ (មហាវិថីសម្តេច ហ៊ុន សែន)។

រយៈពេលប៉ុន្មានឆ្នាំចុងក្រោយនេះ លំហូរនៃការវិនិយោគរបស់ចិន នៅកម្ពុជាមានការកើនឡើងគួរឱ្យកត់សំគាល់ ជាពិសេសការវិនិយោគលើវិស័យសំណង់ និងអចលទ្រព្យ ហាក់មានសកម្មភាពផុសផុលខ្លាំងជាងគេ បើធៀបនឹងប្រទេសផ្សេងៗទៀតដែលវិនិយោគលើវិស័យមួយនេះ។

សំណង់អគារក្នុងរាជធានីភ្នំពេញ

គិតត្រឹមឆ្នាំ២០១៧ កម្ពុជាមានគម្រោងសំណង់សរុបមានប្រមាណ ៣០៥២គម្រោង ដែលសរុបជាផ្ទៃក្រឡាប្រមាណ ១០លានមែត្រការ៉េ និងមានទុនវិនិយោគជាង ៦,៤ពាន់លានដុល្លារអាមេរិក។ ក្នុងនោះចិនគឺជាអ្នកវិនិយោគធំជាងគេបំផុត ដែលមានគម្រោងសាងសង់សរុបចំនួន១៤គម្រោង សរុបជាទឹកប្រាក់ប្រមាណជិត ៣០០លានដុល្លារអាមេរិក។ នេះបើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់៕

អត្ថបទ៖ ឈុត សិរីឧត្តម