អរិភាពពាណិជ្ជកម្ម អាមេរិក-ចិន ឡើងកម្ដៅជាថ្មី

2018-05-30 03:58:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក កាលពីថ្ងៃទី២៩ ខែឧសភា ២០១៨ ម្សិលមិញ បានប្រកាសបន្តគំរាមដំឡើងពន្ធលើការនាំចូលរបស់ចិន ដែលមានទំហំទឹកប្រាក់ ៥០ពាន់លានដុល្លារ ហើយអាមេរិកនឹងបន្ដអនុវត្តវិធានការនេះរហូតដល់ក្រុងប៉េកាំង ដោះស្រាយបញ្ហាការលួចកម្មសិទ្ធិបញ្ញារបស់សហរដ្ឋអាមេរិក។ នេះបើតាមសេចក្តីប្រកាសព័ត៌មានរបស់សេតវិមានអាមេរិក។

ជាងនេះទៅទៀត ក្រុងវ៉ាស៊ីនតោនក៏នឹងចាត់វិធានការលើការវិនិយោគរបស់ក្រុមហ៊ុនចិននៅក្នុងទឹកដីអាមេរិក រួមជាមួយការគ្រប់គ្រងទំនិញសម្រាប់នាំចេញទៅកាន់ប្រទេសចិនផងដែរ។ សេតវិមានបញ្ជាក់ថា ព័ត៌មានលម្អិតនៃការគ្រប់គ្រងការវិនិយោគ និងការនាំចេញ នឹងត្រូវប្រកាសនៅថ្ងៃទី៣០ ខែមិថុនា ហើយបញ្ជីដំឡើងពន្ធចុងក្រោយ នឹងត្រូវចេញផ្សាយនៅថ្ងៃទី១៥ ខែមិថុនា ២០១៨ខាងមុខ។

ចំណែកនៅថ្ងៃទី៣០ ខែឧសភា ២០១៨នេះ ក្រសួងពាណិជ្ជកម្មចិនបានចេញមកឆ្លើយតបថា សេចក្ដីប្រកាសព័ត៌មានរបស់សេតវិមាន គឺមិនត្រូវបានរំពឹងទុក និងមិននៅក្នុងការរំពឹងទុកទាល់តែសោះ។ ក្រសួងពាណិជ្ជកម្មចិនបញ្ជាក់ថា សេចក្តីប្រកាសព័ត៌មានរបស់សេតវិមានអាមេរិក គឺផ្ទុយនឹងកុងសង់ស៊ីស ដែលភាគីទាំងពីរបានយល់ព្រមគ្នា ក្នុងជំនួបចរចានៅក្រុងវ៉ាស៊ីនតោន កាលពីពាក់កណ្ដាលខែឧសភា ២០១៨នេះ។

ជាមួយគ្នានេះ ក្រសួងពាណិជ្ជកម្មចិនបញ្ជាក់ថា ទោះបីជាអាមេរិកចាត់វិធានការអ្វីក៏ដោយ ក៏ចិននៅតែមានទំនុកចិត្ត សមត្ថភាព និងបទពិសោធន៍ដើម្បីការពារផលប្រយោជន៍របស់ប្រជាជនចិន និងផលប្រយោជន៍ស្នូលនៃប្រទេសចិន៕

អត្ថបទ៖ វាសនា