ជនបរទេសដែលកាន់កាប់អត្តសញ្ញាណបណ្ណ-លិខិតឆ្លងដែនកម្ពុជា ត្រូវជាប់ពន្ធនាគារប៉ុន្មានឆ្នាំ?
- 2018-06-03 07:14:22
- ចំនួនមតិ 0 | ចំនួនចែករំលែក 0
ជនបរទេសដែលកាន់កាប់អត្តសញ្ញាណបណ្ណ-លិខិតឆ្លងដែនកម្ពុជា ត្រូវជាប់ពន្ធនាគារប៉ុន្មានឆ្នាំ?
ចន្លោះមិនឃើញ
ជនបរទេសណាដែលកាន់កាប់អត្តសញ្ញាណបណ្ណសញ្ជាតិខ្មែរ ឬលិខិតឆ្លងដែន នៃព្រះរាជាណាចក្រកម្ពុជា ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ។ មន្ត្រីភ្នាក់ងាររាជការ ឬជនណាធ្វើអត្តសញ្ញាណបណ្ណសញ្ជាតិខ្មែរ ឬលិខិតឆ្លងដែនកម្ពុជា ឱ្យជនណាម្នាក់ ដែលមិនមានសញ្ជាតិខ្មែរ ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំផងដែរ។ នេះបើយោងតាមមាត្រា៣០ នៃសេចក្តីព្រាងច្បាប់ស្ដីពីសញ្ជាតិ។
ចំណែកមាត្រា៣១ បានចែងថា ជនណាដែលក្លែងបន្លំអត្តសញ្ញាណបណ្ណសញ្ជាតិខ្មែរ ឬលិខិតឆ្លងដែនកម្ពុជា ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ។ ត្រូវចាត់ទុកជាការក្លែងបន្លំផងដែរនូវអំពើធ្វើការកោស លុប សរសេរបន្ថែម ឬធ្វើឱ្យខូចខាតការពិតនូវព័ត៌មាននៅក្នុងអត្តសញ្ញាណបណ្ណសញ្ជាតិខ្មែរ ឬលិខិតឆ្លងដែនកម្ពុជា។
រីឯមាត្រា៣២ នៃសេចក្តីព្រាងច្បាប់នេះ បានចែងថា ជនបរទេសណាដែលប្រើប្រាស់អត្តសញ្ញាណបណ្ណសញ្ជាតិខ្មែរ ឬលិខិតឆ្លងដែនកម្ពុជា ត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់៤លានរៀន ទៅ១០លានរៀល។ មាត្រា៣៣ បានចែងថា អ្នកផ្តើមគំនិត អ្នកសមគំនិតត្រូវទទួលខុសត្រូវព្រហ្មទណ្ឌចំពោះបទល្មើសដែលមានចែងក្នុងមាត្រា៣០ មាត្រា៣១ និងមាត្រា៣២ នៃច្បាប់នេះ ស្របតាមលក្ខខណ្ឌដូចមានចែងក្នុងក្រមព្រហ្មទណ្ឌ។
សូមជម្រាបថា រដ្ឋសភាបានអនុម័តសេចក្តីព្រាងច្បាប់ស្តីពីសញ្ជាតិ ដោយសំឡេងអនុម័ត១១២ លើ១១២សំឡេងនៅក្នុងអង្គប្រជុំ១កាលពីថ្ងៃទី៣១ ខែឧសភា ឆ្នាំ២០១៨។ សេចក្តីព្រាងច្បាប់នេះ មាន ១០ជំពូក និងចែកចេញជា៣៨មាត្រា។ សេចក្តីព្រាងច្បាប់ស្តីពីសញ្ជាតិនេះ ត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គកាលពីថ្ងៃទី១១ ខែឧសភា ឆ្នាំ២០១៨៕