Duterte ថា លោកនឹងលាលែងពីតំណែង បើមានស្ត្រីគ្រប់គ្រាន់ចេញមកតវ៉ាប្រឆាំងគាត់

2018-06-06 23:25:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីហ្វីលីពីនលោក Rodrigo Duterte បានចេញមុខការពារខ្លួន ចំពោះសកម្មភាពថើបមាត់ស្ត្រីហ្វីលីពីនរៀបការរួចម្នាក់នៅក្នុងប្រទេសកូរ៉េខាងត្បូង ប៉ុន្តែបាននិយាយថា គាត់នឹងលាលែងពីតំណែង ប្រសិនបើមានស្ត្រីគ្រប់គ្នារងការប្រមាថ និងចុះហត្ថលេខាលើញត្តិអំពាវនាវឲ្យគាត់ចុះចេញពីតំណែង។

សកម្មភាពលោក Duterte ថើបមាត់ជាមួយស្ត្រីម្នាក់ ដែលជាពលករនៅកូរ៉េខាងត្បូង កាលពីថ្ងៃអាទិត្យកន្លងទៅ

លោក Duterte បានពណ៌នាអំពីការថើបរបស់គាត់កាលពីថ្ងៃទី៣មិថុនាថាជា “ការសម្តែងសុទ្ធសាធ” ក្នុងគោលបំណងកម្សាន្តអារម្មណ៍ជនរួមជាតិហ្វីលីពីននៅក្រៅប្រទេស។ លោកបានប្រាប់ក្នុងសន្និសីទសារព័ត៌មានមួយនៅពាក់កណ្ដាលអធ្រាត្រកាលពីថ្ងៃអង្គារទី៥មិថុនាបន្ទាប់ពីវិលត្រឡប់ពីដំណើរទស្សនកិច្ចផ្លូវការទៅកាន់ប្រទេសកូរ៉េខាងត្បូងថា “ប្រសិនបើមានស្ត្រីគ្រប់គ្រាន់ចេញមកតវ៉ា…ខ្ញុំគិតថា ប្រសិនបើស្ត្រីទាំងអស់នៅទីនេះចុះហត្ថលេខាលើញត្តិទាមទារឲ្យខ្ញុំចុះចេញពីតំណែង ខ្ញុំនឹងលាលែងពីតំណែងភ្លាម”។

លោក Duterte ថ្លែងទៅកាន់អ្នកសារព័ត៌មាននាពេលកន្លងទៅ (រូបថត៖ ABS-CBN News)

សូមជម្រាបថា ការថើបមាត់ខាងលើ ទទួលការគាំទ្រពីពលករដទៃទៀត ដែលចូលរួមក្នុងពិធីសំណេះសំណាល របស់លោក Duterte កាលពីថ្ងៃអាទិត្យ ប៉ុន្តែត្រូវបានរិះគន់ដោយអង្គការដើម្បីស្ត្រី Gabriela ថាជាទង្វើគួរឲ្យស្អប់ខ្ពើមរបស់ប្រធានាធិបតី ដែលមិនចេះគោរពតម្លៃស្ត្រី៕