ខណ្ឌដង្កោ មានការអភិវឌ្ឍលំនៅឋានច្រើនជាងគេទី៣ នៅរាជធានីភ្នំពេញ

2018-06-15 04:56:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

របាយការណ៍វាយតម្លៃដីធ្លី និងទីផ្សារអចលទ្រព្យក្នុងត្រីមាសទី១ ឆ្នាំ២០១៨ របស់ក្រុមហ៊ុន Vtrust Appraisal បានបង្ហាញថា ខណ្ឌដង្កោ មានការអភិវឌ្ឍច្រើនជាងគេទី៣ ក្នុងរាជធានីភ្នំពេញ បន្ទាប់ពីខណ្ឌពោធិ៍សែនជ័យ និងសែនសុខ។

បច្ចុប្បន្នក្រុមហ៊ុនអភិវឌ្ឍន៍លំនៅឋានបុរីមានដូចជា បុរីពិភពថ្មី លឹមឈាងហាក់ និងបុរីសូនីជាដើម បានសាងសង់គម្រោងលំនៅឋានមួយចំនួននៅក្នុងខណ្ឌដង្កោនេះ។ ការផ្គត់ផ្គង់ លំនៅឋាននៅខណ្ឌនេះ បានឈានដល់ចំនួនប្រមាណជាង ១ម៉ឺន៧ពាន់យូនីត ក្នុងនោះមាន ប្រមាណជាង ១ម៉ឺន១ពាន់យូនីតហើយ ត្រូវបានសាងសង់បញ្ចប់ជាស្ថាពរ។

លើសពីនេះ អ្នកអភិវឌ្ឍ ក៏មានគម្រោងសាងសង់លំនៅឋានចំនួន ៣ពាន់យូនីតបន្ថែមទៀតនៅ ត្រឹមឆ្នាំ២០១៨ ដើម្បីជាការឆ្លើយតបទៅនឹងកំណើនប្រជាជនប្រចាំឆ្នាំ ៨% នៃខណ្ឌដង្កោនេះផងដែរ ។

សំណង់ផ្ទះល្វែង១កន្លែង នៅរាជធានីភ្នំពេញ (រូបតំណាង)

ស្ថិតនៅប៉ែកនីរតីនៃរាជធានីភ្នំពេញ ខណ្ឌដង្កោ មានចំនួនប្រជាជនប្រមាណជាង ១សែននាក់ ហើយមានផ្ទៃដី ១១១ម៉ែត្រការ៉េ បែងចែកជា ១៣សង្កាត់។ ខណ្ឌនេះ ជាខណ្ឌដែលធំជាងគេទី២ បន្ទាប់ពីខណ្ឌពោធិ៍សែនជ័យ ដោយជាប់ព្រំប្រទល់ជាមួយ ខណ្ឌមានជ័យ ខណ្ឌពោធិ៍សែនជ័យ និងខេត្តកណ្តាល។

រយៈពេលជាង ៦ឆ្នាំចុងក្រោយនេះ ដោយរាប់ចាប់ពីឆ្នាំ២០១២ រហូតដល់ឆ្នាំ២០១៧ អត្រាកំណើនដីធ្លីជាមធ្យមប្រចាំឆ្នាំនៅក្នុងខណ្ឌដង្កោ បានកើនឡើង៣៥%។

លោក ហ៊ឹម សីហា នាយកស្រាវជា្រវនៃក្រុមហ៊ុន Vtrust Appraisal បានថ្លែងឱ្យដឹងថា ការហក់ឡើងនៃតម្លៃដីក្នុងខណ្ឌនេះ ដោយសារតែមានការអភិវឌ្ឍហេដ្ឋារចនាសម័ន្ធ កំណើនប្រជាជន រួមទាំងគម្រោងអភិវឌ្ឍទីក្រុងរណប ING Holding City និងគម្រោងសាងសង់ព្រលានយន្តហោះ ដែលមានទីតាំងនៅស្រុកកណ្តាលស្ទឹង ខេត្តកណ្តាល។

តម្លៃដីធ្លីនៅខណ្ឌដង្កោអាចខ្ពស់ ឬទាបអាស្រ័យនឹងចម្ងាយផ្លូវពីវត្តភ្នំ ដែលជាចំណុចកណ្តាលនៃរាជ ធានីភ្នំពេញ។ តម្លៃដី តាមបណ្តោយផ្លូវធំ ដែលជាដីទំនេរចម្ងាយប្រហែល ១០គីឡូម៉ែត្រពីវត្តភ្នំ អាចមានតម្លៃ ៤៥០ដុល្លារក្នុងមួយម៉ែត្រការ៉េ ហើយប្រសិនបើចម្ងាយប្រហែល ២៥គីឡូម៉ែត្រ ពីវត្តភ្នំ តម្លៃដីអាចត្រឹមតែ ១០ដុល្លារក្នុងមួយម៉ែត្រការ៉េ។ យ៉ាងណាមិញ ដីទំនេរដែលមានចម្ងាយ ២ទៅ ៣គីឡូម៉ែត្រនៅសង្កាត់ដង្កោ ស្ថិតនៅតាមបណ្តោយផ្លូវចំការដូង (ឬផ្លូវ២១៧) អាចមានតម្លៃ ចាប់ពី ៤០០ ដុល្លារដល់ ៨០០ដុល្លារក្នុងមួយម៉ែត្រការ៉េ ដែលជាតម្លៃខ្ពស់បំផុតក្នុងសង្កាត់ដង្កោ៕

អត្ថបទ៖ ឈុត សិរីឧត្តម