ដូណាល់ ត្រាំ គំរាមដំឡើងពន្ធលើទំនិញចិន ២០០ពាន់លានដុល្លារបន្ថែមទៀត
- 2018-06-19 03:16:06
- ចំនួនមតិ 0 | ចំនួនចែករំលែក 0
ដូណាល់ ត្រាំ គំរាមដំឡើងពន្ធលើទំនិញចិន ២០០ពាន់លានដុល្លារបន្ថែមទៀត
ចន្លោះមិនឃើញ
ប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ឆេះសង្គ្រាមពាណិជ្ជកម្មជាមួយមហាយក្សចិន ដោយកាលពីថ្ងៃទី១៨ មិថុនាម្សិលមិញ លោកបានបញ្ចេញនូវគម្រោងដំឡើងពន្ធនាំចូល ១០% ទៅលើទំនិញចិនបន្ថែមទៀត ដែលមានទំហំទឹកប្រាក់ប្រមាណ ២០០ ពាន់លានដុល្លារ «បើសិនជាចិនដំឡើងពន្ធនាំចូលរបស់ខ្លួនម្ដងទៀត»។
«ចំណាត់ការផ្សេងៗទៀត នឹងត្រូវធ្វើឡើង ដើម្បីជំរុញឲ្យចិន ផ្លាស់ប្ដូរការអនុវត្តពាណិជ្ជកម្មដែលមិនត្រឹមត្រូវរបស់ខ្លួន ដើម្បីបើកទីផ្សារទទួលយកទំនិញរបស់សហរដ្ឋអាមេរិក ព្រមទាំងយល់ព្រមទទួលយកទំនាក់ទំនងពាណិជ្ជកម្មដែលមានភាពត្រឹមត្រូវជាងនេះជាមួយសហរដ្ឋអាមេរិក។» នេះជាការបញ្ជាក់របស់លោកដូណាល់ ត្រាំក្នុងសេចក្ដីថ្លែងការណ៍។
លោក ត្រាំ បានពន្យល់ទៀតថា «ទំនាក់ទំនងពាណិជ្ជកម្មរវាងសហរដ្ឋអាមេរិក និងចិន ត្រូវតែមានភាពស្មើគ្នាជាងនេះ»។ លោក បានបន្ថែមទៀតថា «ខ្ញុំមានទំនាក់ទំនងល្អជាមួយប្រធានាធិបតីចិន លោកស៊ី ជិនភីង។ យើងនឹងបន្តធ្វើការជាមួយគ្នាដើម្បីដោះស្រាយរឿងនេះ។ ប៉ុន្តែសហរដ្ឋអាមេរិក មិនព្រមឲ្យប្រទេសចិន និងប្រទេសផ្សេងទៀត កេងចំណេញលើផ្នែកពាណិជ្ជកម្មជាមួយអាមេរិកបន្តទៀតជាដាច់ខាត។»
គួររម្លឹកថា ប្រធានាធិបតីអាមេរិក លោក ដូណាល់ ត្រាំ កាលថ្ងៃទី ១៤ មិថុនាកន្លងទៅ បានសម្រេចយល់ព្រមលើការកំណត់ពន្ធនាំចូល ២៥% លើទំនិញចិន ដែលមានតម្លៃប្រមាណជាង ៥០ពាន់លានដុល្លារ ក្នុងនោះភាគច្រើន ជាផលិតផលបច្ចេកវិទ្យា ដែលមហាយក្សចិន ឈានមុខជាងគេ។
ឆ្លើយតបទៅនឹងការប្រកាសរបស់លោកដូណាល់ ត្រាំ មហាយក្សចិន កាលពីថ្ងៃទី១៥ មិថុនាកន្លងទៅ បានសម្រេចកំណត់ពន្ធបន្ថែមចំនួន ២៥% លើទំនិញ ៦៥៩មុខរបស់សហអាមេរិក ដែលមានទំហំទឹកប្រាក់ ៥០ពាន់លានដុល្លារ ក្នុងនោះ ទំនិញ ៥៤៥មុខ ដែលមានទំហំទឹកប្រាក់ ៣៤ពាន់លានដុល្លារ ជាផលិតផលកសិកម្ម៕