ត្រាំ លើកលែងពន្ធលើផលិតផលរបស់ក្រុមហ៊ុនយក្សអាមេរិក១ ដែលមានរោងចក្រនៅចិន

2018-06-19 06:56:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធិបតីអាមេរិក ដូណាល់ ត្រាំ បានប្រាប់ទៅកាន់នាយកប្រតិបត្តិរបស់ក្រុមហ៊ុន Apple លោក Tim Cook ថា រដ្ឋាភិបាលអាមេរិកនឹងមិនយកពន្ធលើផលិតផល iPhones ដែលត្រូវបានដំឡើងនៅក្នុងប្រទេសចិននោះទេ។ នេះជាការចុះផ្សាយរបស់សារព័ត៌មាន New York Times កាលពីថ្ងៃទី១៨ ខែមិថុនា ឆ្នាំ២០១៨។

លោក Time Cook កំពុងស្ដាប់ប្រសាសន៍របស់លោក ត្រាំ ក្នុងអំឡុងជំនួបបច្ចេកវិទ្យា នៅសេតវិមាន នាពេលកន្លងទៅ (រូបថត៖ news.sky.com)

ការឲ្យដឹងនេះ ត្រូវធ្វើឡើងបន្ទាប់ពីលោក Cook បានចូលជួបពិភាក្សាជាមួយលោក ត្រាំ នៅសេតវិមាន កាលពីខែឧសភា ពាក់ព័ន្ធនឹងបញ្ហាពន្ធដែលលោកប្រធានាធិបតី កំណត់ចំពោះផលិតផលដែលនាំចូលពីប្រទេសចិន។

យ៉ាងណាក៏ដោយ ចំពោះការសម្រេចមិនយកពន្ធលើ iPhone នេះ ភាគីក្រុមហ៊ុន Apple និង សេតវិមាន មិនទាន់បានប្រកាសប្រាប់ឲ្យដឹងជាផ្លូវការនៅឡើយទេ។

យោងតាមវេបសាយ Lifewire បានឲ្យដឹងថា ផលិតផល iPhone ក៏ដូចជា iPod និង iPad ត្រូវបានដំឡើងដោយក្រុមហ៊ុនសំខាន់ៗពីរ ដែលមានមូលដ្ឋាននៅកោះតៃវ៉ាន់ គឺ Foxconn និង Pegatron ។

iPhone X

កាលពីថ្ងៃសុក្រ សប្ដាហ៍កន្លងទៅ អ្នននាំពាក្យការិយាល័យពាណិជ្ជកម្មអាមេរិក បានបញ្ជាក់ថា ទំនិញចិន រួមទាំងផលិតផលបច្ចេកវិទ្យាសំខាន់ៗ ដែលស្មើនឹងទំហំទឹកប្រាក់ ៥០ពាន់លានដុល្លារ ត្រូវបានដាក់ឲ្យស្ថិតក្រោមគោលការណ៍ពន្ធ ២៥% ។ ក្នុងនោះ ផលិតផលជាង ១១០០ប្រភេទរបស់ចិន បានទទួលរងផលប៉ះពាល់ពីការកំណត់ពន្ធរបស់អាមេរិក៕

អត្ថបទ៖ លាភ.