សង្គ្រាមពាណិជ្ជកម្មអាមេរិក-ចិន អាចផ្តល់ផលវិជ្ជមានដល់ប្រទេសវៀតណាម តែ...
- 2018-06-20 03:37:08
- ចំនួនមតិ 0 | ចំនួនចែករំលែក 0
សង្គ្រាមពាណិជ្ជកម្មអាមេរិក-ចិន អាចផ្តល់ផលវិជ្ជមានដល់ប្រទេសវៀតណាម តែ...
ចន្លោះមិនឃើញ
ការកើនឡើងកម្ដៅពាណិជ្ជកម្មថ្មីៗនេះរវាងសហរដ្ឋអាមេរិក និងចិន អាចផ្តល់ផលវិជ្ជមានដល់ឧស្សាហកម្មមួយចំនួន ក្នុងប្រទេសវៀតណាម ប៉ុន្តែអ្នកជំនាញក៏បានព្រមានថា ផលចំណេញទាំងនោះ អាចបានត្រឹមរយៈពេលខ្លីប៉ុណ្ណោះ។
សហរដ្ឋអាមេរិក បានកំណត់ពន្ធនាំចូល២៥% លើទំនិញយុទ្ធសាស្ត្រសំខាន់ៗប្រមាណជាង៨០០ មុខ ដែលនាំចូលពីប្រទេសចិន រួមមាន រថយន្ត និងប្រេងជាដើម ខណៈចិនបានប្រកាសថា ខ្លួននឹងកំណត់ពន្ធនាំចូល២៥% ទៅលើទំនិញសហរដ្ឋអាមេរិកប្រមាណ៦៥៩ មុខ រួមមាន សណ្តែកសៀង និងគ្រឿងសមុទ្រជាដើម។ នេះបើតាមការចុះផ្សាយរបស់សារព័ត៌មាន Reuters។
ទាក់ទងនឹងរឿងនេះ តំណាងសមាគមឧស្សាហកម្មឈើ និងសិប្បកម្មនៃទីក្រុងហូជីមិញ (HAWA) បានប្រាប់ទៅកាន់កាសែតវៀតណាម Tuoi Tre ថា ជំនួញឈើរបស់វៀតណាម នឹងទទួលបានផលចំណេញពីសង្គ្រាមពាណិជ្ជកម្មនេះ ក្រោយពីសហរដ្ឋអាមេរិក កំណត់ពន្ធនាំចូលយ៉ាងធ្ងន់ធ្ងរទៅលើផលិតផលឈើរបស់ចិន នាខែកក្កដាខាងមុខ។
ក្នុងរយៈពេល២ខែដំបូងនៃដើមឆ្នាំ២០១៨នេះ ការនាំចេញឈើពីវៀតណាមទៅកាន់សហរដ្ឋអាមេរិកមានចំនួនដល់ទៅ ៣៩,៧% គឺកើនចំនួន ១៤,៦% បើធៀបទៅនឹងឆ្នាំមុន។ ហេតុផលដែលធ្វើឲ្យមានការកើនឡើងយ៉ាងគំហុកនេះ ក៏ព្រោះតែសហរដ្ឋអាមេរិកបានដំឡើងពន្ធលើទំនិញនាំចូលរបស់ចិន កាលពីចុងឆ្នាំ២០១៧។ នេះបើតាមការចុះផ្សាយរបស់សារព័ត៌មានវៀតណាម VietnamExpress នៅថ្ងៃទី២០ មិថុនា ឆ្នាំ២០១៨នេះ។
យោងតាមស្ថិតិរបស់ HAWA បានបញ្ជាក់ថា វៀតណាមឈរនៅលេខរៀងទី៥ នៃអ្នកនាំចេញឈើច្រើនបំំផុតទៅកាន់សហរដ្ឋអាមេរិក ខណៈប្រទេសចិនឈរនៅលំដាប់កំពូល។ បើសិនជំនួញរបស់វៀតណាមអាចឆ្លៀតយកឱកាសនេះបាន កំណើនការនាំចេញឈើទៅកាន់សហរដ្ឋអាមេរិក អាចកើនឡើងលឿនជាងពេលនេះមិនខាន។ នេះជាលើកឡើងរបស់អ្នកជំនាញ។
ក្រៅពីផលិតផលឈើ ជំនួញដែកថែបវៀតណាម ក៏អាចនឹងចំណេញពីការសង្គ្រាមពាណិជ្ជកម្មនេះផងដែរ។ នេះបើតាមការបញ្ជាក់របស់ប្រធានទីផ្សារនៃក្រុមហ៊ុនដែកថែបវៀតណាម Vietnam Italy Steel Jsc លោក Nguyen Huy Do ប្រាប់ទៅកាន់កាសែតវៀតណាម Tuoi Tre។
យ៉ាងណាមិញ ក្រុមអ្នកជំនាញឧស្សាហកម្មមួយចំនួនក៏បានព្រមានដែរថា ប្រទេសចិនប្រហែលជាអាចវិនិយោគក្នុងរោងចក្រផលិតដែកថែបវៀតណាម ដើម្បីទទួលបាន «ស្លាកសញ្ញាវៀតណាម» នៅលើផលិតផល ដែលនឹងអាចនាំចេញទៅកាន់សហរដ្ឋអាមេរិកបាន ដោយមិនជាប់ពន្ធធ្ងន់ធ្ងរ។
គួររម្លឹកថា កាលពីខែមុន ក្រសួងពាណិជ្ជកម្មសហរដ្ឋអាមេរិកបានដំឡើងពន្ធនាំចូលទៅលើទំនិញដែកថែបវៀតណាម ដែលមានប្រភពមកពីប្រទេសចិច។ ក្រោយពីកើតហេតុការណ៍នេះ សមាគមដែកថែបវៀតណាមបានស្នើសុំឲ្យអាជ្ញាធររឹតបន្តឹងការគ្រប់គ្រងលើការវិនិយោគក្នុងវិស័យជំនួញដែកថែបពីបរទេស៕