កម្ពុជា-ចិន ចុះកិច្ចព្រមព្រៀងលើគម្រោង ដោះមីន ប្រព័ន្ធដឹកជញ្ជូន និងជួសជុលរាជវាំងនៅអង្គរ

2018-06-20 03:04:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី Gao Yan អនុរដ្ឋមន្រ្តីក្រសួងពាណិជ្ជកម្មចិន បានធ្វើជាអធិបតីភាពក្នុងពិធីចុះហត្ថលេខាលើឯកសារចំនួន៣ កាលពីថ្ងៃទី១៩ ខែមិថុនា ឆ្នាំ២០១៨ នៅស្តីទីការក្រសួងសេដ្ឋកិច្ច។ យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច បានឱ្យដឹងថា ឯកសារទាំងនោះរួមមានដូចខាងក្រោម៖

១. លិខិតប្រគល់-ទទួល នូវថវិកាហិរញ្ញប្បទានឥតសំណងចំនួន ២,៥លានដុល្លារ សម្រាប់ការអនុវត្តគម្រោងកាត់បន្ថយយុទ្ធភ័ណ្ឌមិនទាន់ផ្ទុះនៅកម្ពុជា។ ថវិកាហិរញ្ញប្បទានឥតសំណងនេះ នឹងត្រូវបានប្រើប្រាស់សម្រាប់រួមចំណែកការងារបោសសម្អាតមីន និងយុទ្ធភ័ណ្ឌមិនទាន់ផ្ទុះ សម្រាប់បម្រើវិស័យមនុស្សធម៌ នៅកម្ពុជា ដែលនឹងត្រូវអនុវត្តដោយមជ្ឈមណ្ឌលសកម្មភាពកម្ចាត់មីនកម្ពុជា។

២. កិច្ចព្រមព្រៀងសម្រាប់រៀបចំផែនការស្តីពីប្រព័ន្ធដឹកជញ្ជូននៅកម្ពុជា ដោយផ្តោតជាពិសេសលើប្រព័ន្ធផ្លូវគោក ផ្លូវដែក ផ្លូវទឹកផ្ទៃក្នុង ការដឹកជញ្ជូនតាមសមុទ្រ អាកាសចរណ៍ស៊ីវិល និងឡូជីស្ទីក។

៣. កិច្ចព្រមព្រៀងសម្រាប់ការអនុវត្តគម្រោងជួសជុលព្រះបរមរាជវាំងនៅប្រាសាទអង្គរវត្ត ខេត្តសៀមរាប។ បន្ទាប់ពីការចុះហត្ថលេខាលើកិច្ចព្រមព្រៀងរួច ភាគីចិន នឹងសហការជាមួយអាជ្ញាធរជាតិអប្សរា និងក្រសួងវប្បធម៌ និងវិចិត្រសិល្បៈ ដើម្បីស្តារឡើងវិញនូវស្ថាបត្យកម្ម ការងារពាក់ព័ន្ធនឹងបុរាណវិទ្យា ការអភិរក្សចម្លាក់ថ្មជាដើម។

លោកស្រី Gao Yan ក្នុងជំនួបជាមួយលោក អូន ព័ន្ធមុនីរ័ត្ន កាលពីថ្ងៃទី១៩ ខែមិថុនា ឆ្នាំ២០១៨ នៅទីស្តីការក្រសួងសេដ្ឋកិច្ច។ រូបថត៖ ក្រសួងសេដ្ឋកិច្ច

ក្នុងឱកាសនោះដែរ ភាគីទាំង២ ក៏បានរួមគ្នាប្រកាសបើកជាផ្លូវការនូវគម្រោងហិរញ្ញប្បទានឥតសំណងពីប្រទេសចិន សម្រាប់ការកែលម្អបរិស្ថានសាលារៀន និងការផ្គត់ផ្គង់សម្ភារៈបរិក្ខារអប់រំ។ គម្រោងនេះ នឹងធ្វើឡើងនៅវិទ្យាល័យចំនួន២៦ និងមជ្ឈមណ្ឌលបណ្តុះបណ្តាលគ្រូចំនួន ១ នៅរាជធានីភ្នំពេញ ១ នៅខេត្តកំពង់ចាម និង១ទៀតនៅខេត្តកណ្តាល។

សូមជម្រាបថា គិតពីឆ្នាំ២០០១ ដល់ថ្ងៃទី១៩ ខែមិថុនា ឆ្នាំ២០១៨ រដ្ឋាភិបាលចិន បានសន្យាផ្តល់ហិរញ្ញប្បទានសហប្រតិបត្តិការមានទឹកប្រាក់សរុបចំនួនជាង ៥,២ពាន់លានដុល្លារ ក្នុងនោះហិរញ្ញប្បទានឥតសំណង និងឥណទានឥតការប្រាក់សរុបមានចំនួនជាង ១,២ពាន់លានដុល្លារ៕

អត្ថបទ៖ សំភី