អ្នកនាំពាក្យក្រសួង បញ្ជាក់ពីថ្ងៃបើកដំណើរការសាកល្បងផ្លូវដែកភ្នំពេញ-ប៉ោយប៉ែតហើយ
- 2018-06-20 11:54:28
- ចំនួនមតិ 0 | ចំនួនចែករំលែក 0
អ្នកនាំពាក្យក្រសួង បញ្ជាក់ពីថ្ងៃបើកដំណើរការសាកល្បងផ្លូវដែកភ្នំពេញ-ប៉ោយប៉ែតហើយ
ចន្លោះមិនឃើញ
លោក លី បូរិន អ្នកនាំពាក្យក្រសួងសាធារណការ និងដឹកជញ្ជូន បានឲ្យដឹងថា តាមគម្រោងផ្លូវដែកភ្នំពេញ-ប៉ោយប៉ែត នឹងបើកដំណើរការ សាកល្បងចាប់ពីថ្ងៃទី០៤ ខែកក្កដា ឆ្នាំ២០១៨ ហើយប្រជាពលរដ្ឋអាចប្រើប្រាស់សេវានេះ ដោយមិនត្រូវបានយកលុយឡើយ រហូតដល់ថ្ងៃទី០១ ខែសីហាខាងមុខ។ នេះជាការចុះផ្សាយរបស់ទីភ្នាក់ងារសារព័ត៌មានកម្ពុជា នៅថ្ងៃទី២០មិថុនា។
លោកបានបន្ដថា ដើម្បីឲ្យសម្រេចបាន តាមផែនការកំណត់នេះ ក្រសួងបានផ្តល់សិទ្ធិឲ្យក្រុមហ៊ុនឯកជនចំនួន៤ ធ្វើការកែលម្អជួសជុលកំណាត់ផ្លូវដែកដែលមានប្រវែងជាង ១៦០គីឡូម៉ែត្រនេះ ដោយធ្វើសកម្មភាពទាំងយប់ទាំងថ្ងៃ ដើម្បីធ្វើយ៉ាងណាពន្លឿនការតភ្ជាប់ផ្លូវដែក ឡើងវិញពីភ្នំពេញរហូតដល់ ប៉ោយប៉ែតព្រំដែនកម្ពុជា-ថៃ។
សូមបញ្ជាក់ថា ផ្លូវដែកពីភ្នំពេញ ឆ្ពោះទៅកាន់ក្រុងប៉ោយប៉ែត ព្រំដែនកម្ពុជា-ថៃ មានប្រវែងជាង ៣៨០គីឡូម៉ែត្រ ឆ្លងកាត់រាជធានី ខេត្តចំនួន៧ ក្នុងនោះ មានរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ ហើយ បច្ចុប្បន្នផ្លូវដែកនេះបានតភ្ជាប់ពីក្រុងប៉ោយប៉ែត ព្រំដែនកម្ពុជា ថៃ មកដល់ខេត្ត ពោធិ៍សាត់រួចហើយ៕