ចិន ពិចារណាបង្កើនការទិញអង្ករកម្ពុជា និងផលិតផលផ្សេងទៀត នៅឆ្នាំ២០១៩

2018-06-21 02:45:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបលើកទី៥ នៃគណៈកម្មការចម្រុះទ្វេភាគីកម្ពុជា-ចិន នៅសណ្ឋាគារសុខាភ្នំពេញ កាលពីថ្ងៃទី១៩មិថុនា ភាគីចិនដែលដឹកនាំដោយលោកស្រី កៅ យាន អនុរដ្ឋមន្ត្រីក្រសួងពាណិជ្ជកម្មចិន បានបង្ហាញការចាប់អារម្មណ៍ក្នុងការបង្កើនការទិញផលិតផលបន្ថែមពីកម្ពុជា រួមទាំងការទិញអង្ករ ផងដែរ សម្រាប់ឆ្នាំ២០១៩ខាងមុខនេះ។

លោក ប៉ាន សូរស័ក្តិ ផ្ដល់វត្ថុអនុស្សាវរីយ ជូនលោកស្រី កៅ យាន អនុរដ្ឋមន្ត្រីក្រសួងពាណិជ្ជកម្មចិន អំឡុងជំនួបលើកទី៥ នៃគណៈកម្មការចម្រុះទ្វេភាគីកម្ពុជា-ចិន នៅសណ្ឋាគារសុខាភ្នំពេញ កាលពីថ្ងៃទី១៩មិថុនា (រូបថត៖ ក្រសួងពាណិជ្ជកម្ម)

ក្នុងកិច្ចប្រជុំដើម្បីត្រួតពិនិត្យលទ្ធផលនៃកិច្ចសហប្រតិបត្តិការក្នុងបណ្តាឆ្នាំកន្លងមក និងលើកទិសដៅការងារដើម្បីជំរុញទំហំពាណិជ្ជកម្ម និងវិនិយោគទ្វេភាគីឲ្យបានដល់ ៦ពាន់លានដុល្លារ នៅត្រឹមឆ្នាំ២០២០ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងអំណរគុណដល់រដ្ឋាភិបាលចិន ដែលកន្លងមកតែងតែជួយគាំទ្រការអនុវត្តគម្រោងនានារបស់កម្ពុជា និងបានកៀរគរវិនិយោគិន ឲ្យចូលមកបណ្ដាក់ទុននៅកម្ពុជា ក្រោមក្របខ័ណ្ឌវិថីមួយ ខ្សែក្រវាត់មួយ។

លោក ប៉ាន សូរស័ក្តិ និងលោកស្រី កៅ យាន បានអបអរចំពោះកំណើនពាណិជ្ជកម្មទ្វេភាគីក្នុងឆ្នាំ២០១៧ ដែលសម្រេចបានប្រមាណ ៥៨០០លានដុល្លារអាមេរិក ពោលគឺបានកើនឡើង ២១,៨% បើធៀបនឹងឆ្នាំ២០១៦ ដែលមានត្រឹមតែ ៤៧៦០លានដុល្លារអាមេរិក។ ក្នុងនោះការនាំចេញរបស់កម្ពុជាទៅចិន បានកើនឡើងចំនួន ២២% ប្រៀបធៀបនឹងឆ្នាំ២០១៦ ដែលមានចំនួនត្រឹមតែ ៣៩២៩លានដុល្លារប៉ុណ្ណោះ។

កម្មករម្នាក់ កំពុងសែងប៉ាវអង្ករ

តាមរបាយការណ៍របស់លេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្គរ បានឲ្យដឹងថា នៅក្នុងរយៈពេល៤ខែ ដើមឆ្នាំ២០១៨ ចិនឈរនៅលេខ១ ដោយបាននាំចូលអង្ករកម្ពុជាច្រើនជាងគេ ប្រមាណជាង ៥ម៉ឺនតោន តាមពីក្រោយដោយបារាំង ២,៦ម៉ឺនតោន និងប៉ូឡូញ១,១ម៉ឺនតោន។ កាលពីឆ្នាំ២០១៧ កម្ពុជានាំចេញអង្ករបានជាង ៦៣ម៉ឺនតោន៕

អត្ថបទ៖ លាភ.