ចិនសោកស្ដាយ ខណៈក្រុមប្រឹក្សាសិទ្ធិមនុស្ស UN ចាត់វិធានការបន្ទាប់ ក្រោយអាមេរិកចាកចេញ
- 2018-06-21 03:13:18
- ចំនួនមតិ 0 | ចំនួនចែករំលែក 0
ចិនសោកស្ដាយ ខណៈក្រុមប្រឹក្សាសិទ្ធិមនុស្ស UN ចាត់វិធានការបន្ទាប់ ក្រោយអាមេរិកចាកចេញ
ចន្លោះមិនឃើញ
ក្រសួងការបរទេសចិនបានសម្ដែងការសោកស្ដាយចំពោះអាមេរិក ដែលបានចាកចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ។ ចំណែកមន្ត្រីជាន់ខ្ពស់ក្រុមប្រឹក្សាសិទ្ធិមនុស្សអង្គការសហប្រជាជាតិវិញបានបញ្ជាក់ថា សមាជិកថ្មីនឹងត្រូវធ្វើការបោះឆ្នោតឆាប់ៗនេះ ដើម្បីជំនួសសហរដ្ឋអាមេរិកសម្រាប់អាណត្តិដែលនៅសល់ ក្នុងក្រុមប្រឹក្សាសិទ្ធិមនុស្ស។
ក្រោយអាមេរិកប្រកាសចាកចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ លោក Geng Shuang អ្នកនាំពាក្យក្រសួងការបរទេសចិនបានចេញមកបញ្ជាក់ថា "ចិនសោកស្ដាយចំពោះការដកខ្លួនរបស់អាមេរិកចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ... ក្រុមប្រឹក្សានេះត្រូវបានបង្កើតឡើងស្របតាមតម្រូវការរបស់មហាសន្និបាតអង្គការសហប្រជាជាតិ ដែលជាវេទិកាដ៏សំខាន់មួយ សម្រាប់ភាគីជាច្រើនធ្វើការពិភាក្សា កិច្ចសហប្រតិបត្តិការ និងផ្លាស់ប្ដូរបទពិសោធន៍គ្នា និងដើម្បីលើកកម្ពស់ការអភិវឌ្ឍ និងសិទ្ធិមនុស្ស"។
អ្នកនាំពាក្យរូបនេះបន្ថែមថា ភាគីទាំងអស់ត្រូវតែយកចិត្តទុកដាក់ចំពោះបញ្ហានេះ។
ងាកទៅលោក Vojislav Suc ប្រធានក្រុមប្រឹក្សាសិទ្ធិមនុស្សអង្គការសហប្រជាជាតិវិញបានថ្លែងទៅកាន់កិច្ចប្រជុំលើកទី៣៨ នៃក្រុមប្រឹក្សា នៅក្រុងហ្សឺណែវថា គាត់បានទទួលការជូនដំណឹងជាផ្លូវការពីការចាកចេញរបស់អាមេរិកហើយ។ លោកបន្ថែមថា លោកនឹងស្នើទៅកាន់លេខាធិការដ្ឋានអង្គការសហប្រជាជាតិ ដើម្បីចាត់វិធានការជាបន្តបន្ទាប់ទៀត៕