លោក គីម ជុងអ៊ុន ផ្តោតលើវិស័យថ្មី១ ក្រោយបោះបង់នុយក្លេអ៊ែរ

2018-06-21 06:20:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីបានយល់ព្រមលុបបំបាត់នុយក្លេអ៊ែរ ក្នុងជំនួបកំពូលជាមួយមេដឹកនាំកូរ៉េខាងត្បូង និងអាមេរិក នាពេលកន្លងមក ពេលនេះ លោក គីម ជុងអ៊ុន មេដឹកនាំកូរ៉េខាងជើង កំពុងផ្តោតការយកចិត្តទុកដាក់ ទៅលើវិស័យទេសចរណ៍ ក្នុងការអភិវឌ្ឍប្រទេស។

យោងតាមការចុះផ្សាយរបស់សារព័ត៌មាន Straitstimes នៅថ្ងៃទី២១ ខែមិថុនា ឆ្នាំ២០១៨នេះ ឱ្យដឹងថា លោក គីម ជុងអ៊ុន កំពុងជំរុញលើគម្រោងទេសចរណ៍ដ៏ធំ១ នៅក្រុងឆ្នេរសមុទ្រ Wonsan ដែលស្ថិតនៅភាគខាងកើតប្រទេស មានចម្ងាយប្រមាណ ១៨០គីឡូម៉ែត្រ ពីក្រុងព្យុងយ៉ាង។

លោក គីម ជុងអ៊ុន ក្នុងអំឡុងពេលធ្វើទស្សនកិច្ចនៅក្រុងតំបន់ទេសចរណ៍ Wonsan-Kalma កាលពីខែឧសភា ឆ្នាំ២០១៨ (រូបថត៖ Yonhap)

លោក គីម បានធ្វើទស្សនកិច្ចនៅតំបន់ទេសចរណ៍ Wonsan-kalma ដោយបញ្ជាឱ្យក្រុមការងារឆាប់បញ្ចប់គម្រោងនេះ នៅត្រឹមថ្ងៃទី១៥ ខែមេសា ឆ្នាំ២០១៩ ពោលគឺចំថ្ងៃខួបកំណើតរបស់ស្ថាបនិកកូរ៉េខាងជើង លោក គីម អ៊ីលស៊ុង។ នេះបើតាមសេចក្តីរាយការណ៍របស់ KCNA កាលពីខែឧសភា។

គួររំលឹកថា កាលពីថ្ងៃទី១២ ខែមិថុនា ឆ្នាំ២០១៨កន្លងទៅ លោកប្រធានាធិបតីអាមេរិក ដូណាល់ ត្រាំ បាននិយាយថា កូរ៉េខាងជើង ជាប្រទេសមានសក្តានុពលសម្រាប់ការសាងសង់ខុនដូ និងសណ្ឋាគារ នៅតំបន់ឆ្នេរសមុទ្រ។ ការថ្លែងនេះ ធ្វើឡើងក្នុងសន្និសីទសារព័ត៌មាន ក្រោយជំនួបកំពូលជាមួយលោក គីម ជុងអ៊ុន នៅសិង្ហបុរី។

KCNA ក៏បានបញ្ជាក់ដែរថា នៅប៉ុន្មានម៉ោងប៉ុណ្ណោះមុនជំនួបជាមួយលោក ដូណាល់ ត្រាំ លោក គីម បានដើរកម្សាន្តនៅក្នុងប្រទេសសិង្ហបុរី ដើម្បីស្វែងយល់ពីការអភិវឌ្ឍសង្គម និងសេដ្ឋកិច្ចរបស់ប្រទេសអាស៊ាន១នេះ។

លោក Kim Yong Chol អនុប្រធាននៃគណៈកម្មាធិការបក្សពលករ ត្រូវបានសារព័ត៌មានកូរ៉េខាងជើង១ផ្សេងទៀត រាយការណ៍ថា បានស្នើការគាំទ្រវិនិយោគ ពីសហរដ្ឋអាមេរិក សម្រាប់ការអភិវឌ្ឍតំបន់ទេសចរណ៍នេះ។

បើតាមលោក Kim Young Hui ដែលជាអ្នកជំនាញ១រូបសិក្សាអំពីប្រទេសកូរ៉េខាងជើង មកពីធនាគារអភិវឌ្ឍន៍កូរ៉េ បាននិយាយថា ក្រុង Wonsan ជាតំបន់ភូមិសាស្រ្តដ៏អំណោយផល១ ពិសេសនៅជិតព្រំដែនកូរ៉េខាងត្បូង។ អ្នកទេសចរ នៅក្រុងសេអ៊ូល អាចធ្វើដំណើរទៅ Wonsan បានយ៉ាងងាយស្រួលតាមផ្លូវដែក។

ទិដ្ឋភាពក្រុង Wonsan ថតពីលើអាកាស (រូបថត៖ Yonhap)

លោកយល់ថា កូរ៉េខាងជើង ចង់បញ្ចប់គម្រោងទេសចរណ៍ខាងលើនេះឱ្យបានឆាប់ ដើម្បីជំរុញគម្រោងរបស់កូរ៉េទាំង២ និងទាក់ទាញអ្នកវិនិយោគ ក្នុងពេលដែលទំនាក់ទំនងប្រទេសទាំង២ កំពុងមានភាពល្អប្រសើរឡើង ហើយទណ្ឌកម្មសេដ្ឋកិច្ច ក៏នឹងត្រូវដកចេញពីកូរ៉េខាងជើង ឆាប់ៗនេះផងដែរ។

ជាច្រើនឆ្នាំមកនេះ កូរ៉េខាងជើង បានរងការដាក់ទណ្ឌកម្មសេដ្ឋកិច្ចពីអន្តរជាតិ ដូចជា ការដាក់កំហិតលើការនាំចេញធ្យូងថ្ម ដែក អាហារសមុទ្រ និងវាយនភណ្ឌជាដើម ព្រមទាំងការកំណត់ការនាំចូលប្រេងឆៅរបស់ប្រទេសនេះផងដែរ ដោយសារកម្មវិធីមីស៊ីល និងនុយក្លេអ៊ែរ៕

ប្រភព៖ Straits Times ប្រែសម្រួល៖ សំភី